Тројцата македонски државјани што се наоѓаат на бродот „Дајмонд принцес“ во пристаништето во јапонскиот град Јокохама се во добра здравствена состојба, соопшти денеска Министерството за надворешни работи.

Крузерот е во двонеделен карантин во пристаништето во Јокохама, откако кај еден патник што се симнал од бродот во Хонг Конг му бил дијагностициран новиот коронавирус.

Од МНР посочуваат дека нашата амбасада во Токио остварила директна комуникација со тројцата македонски државјани што се наоѓаат на бродот во Јокохама. Станува збор за двајца мажи и една жена, членови на екипажот.

Бројот на случаи со коронавирус на бродот, кој е во карантин, се зголеми на 130, јавија локалните медиуми, повикувајќи се на извор од јапонското министерство за здравство. На бродот има околу 3.700 патници и членови на екипаж.