Системите за надзор на пазарот играат значајна улога во одржувањето безбедни пазари и поттикнување на довербата меѓу потрошувачите и економските оператори. Развиените и ефективни системи за надзор на пазарот се предуслов за подобрување на безбедноста и усогласеноста на производите што се пласираат на пазарот, а следствено имаат големо влијание врз заштитата на потрошувачите.
Ова беше заклучено на регионалната работилница во рамките на проектот ГИЗ „Поддршка на регионалната економска интеграција“, која се одржа во Скопје, 8-9 март 2023 година. Претставници од органите за надзор на пазарот на економиите на ЦЕФТА се собраа со цел да отворат дискусијата за развивање заедничко разбирање на конкретните активности насочени кон унапредување на размената на информации преку ефективна соработка помеѓу органите за надзор на пазарот. Работилницата беше организирана од Германското друштво за интернационална соработка (ГИЗ) во име на Европската Унија (ЕУ) и Германското сојузно министерство за економска соработка и развој (БМЗ).
Илир Реџа, проект-менаџер во ГИЗ, изјави дека размената на информации и градењето ефикасна соработка меѓу органите за надзор на пазарот од членките на ЦЕФТА е од суштинско значење за ефикасен, сеопфатен и доследен надзор на пазарот во регионот. „Ова ќе го стимулира развојот на похармонизиран систем за надзор на пазарот, кој ќе овозможи сигурна размена на информации за небезбедните производи што се наоѓаат на пазарот. Договорите за структурирана и систематска размена на информации ќе им овозможат на сите членки на ЦЕФТА да отстранат одредени небезбедни производи од нивните пазари и да ги заштитат своите потрошувачи“, рече Реџа.
Џером Бенаус од DG NEAR ги посочи достигнувањата на состанокот благодарение на конструктивниот ангажман на учесниците и на поддршката од тимот експерти. Тој оцени дека наодите од прашалникот спроведен од проектот меѓу органите за надзор на пазарот на членките на ЦЕФТА обезбедуваат многу корисна основа за зајакнување на размената на информации и соработката меѓу членките на ЦЕФТА во областа на безбедноста на индустриските производи.
Овој состанок е продолжение на проектните напори за подобрување на размената на информации и градење ефикасна соработка помеѓу органите за надзор на пазарот. Тоа е, исто така, можност да се искористи потенцијалот на постојната експертиза за да се намалат постојните празнини и предизвици за небезбедните производи на пазарите на ЦЕФТА.
Проектот има цел да ја зајакне регионалната економска интеграција меѓу членките на ЦЕФТА. Во областа на инфраструктурата за квалитет обезбедува поддршка за членките на ЦЕФТА во зајакнувањето на основните аспекти на системите за инфраструктура за квалитет во согласност со правото на ЕУ, за да се стимулира слободното движење на индустриските стоки и да се обезбеди правична конкуренција и заштита на потрошувачите преку подобрен систем за надзор на пазарот.
ГИЗ Отворен регионален фонд за Југоисточна Европа – Надворешна трговија (ORF FT)
(Комерцијална објава)