Жената што на славната аукција ја купи сликата на Бенкси за повеќе од милион фунти вели дека ќе ја задржи и покрај тоа што, во сосема неочекуван развој на настаните, сликата се самоуништи.

По само еден момент откако беше објавено дека сликата „Девојче со балон“ е продадена на аукција во лондонската куќа „Сотби“, таа се самоуништи. Од компанијата „Пест контрол“, која го застапува Бенкси - мистериозниот уметник чиј идентитет сè уште е мистерија, истакнаа дека самоуништената слика добила ново име: „Љубовта е во кантата“.

Од „Сотби“ потврдија дека делото е продадено за 1.042.000 фунти и дека новата сопственичка ќе го плати целиот износ.

Жената што ја купила сликата, а сака да остане анонимна, истакнала дека првин била шокирана, но потоа сфатила дека ќе поседува едно посебно парче уметност.