Во аудиториумот „Парко дела музика“, на Римскиот филмски фестивал, за време на новинарската проекција на филмот „Врба“ на Милчо Манчевски беше преполно. На прес-скринингот присуствуваа повеќе од 80 светски медиуми, меѓу кои и најрелевантните италијански медиуми. На проекцијата, покрај новинарите присуствуваа и студенти од факултетите по историја на уметност и од факултетите за драмски уметности од Рим. Салата беше полна до последното место.
Веднаш по новинарската проекција беше одржана конференција за печат на која присуствуваа режисерот Милчо Манчевски и трите хероини од „Врба“, актерките Сара Климоска, Наталија Теодосиева и Камка Тоциновски.
- Луѓето се исти, без оглед каде и кога живеат. Она што нам ни беше важно е да проговориме за човековите дилеми, болки, разочарувања и радости... од аспект на еден обичен човек, женски човек. „Врба“ можеби не е моето омилено дрво (ако подобро размислам повеќе ги сакам тополата, кипарисот, липата и медитеранскиот бор), ама врбата е поблиска како симбол со она што го кажува филмот. Жална врба - ова се три тажни приказни со среќен крај - изјави Манчевски.
Трите актерки Сара, Наталија и Камка блеснаа во полн сјај на средбата со новинарите, одговарајќи искрено и непосредно на прашања врзани со нивните ликови од филмот.
Вистински куриозитет е што на крајот новинарите ја почестија филмската екипа со френетичен аплауз.
И по завршувањето на проекцијата на „Врба“ се случи долга тишина, па аплауз, што е необично за прес-проекции.
Официјалната светска гала-премиера на „Врба“ беше вчера во 22:30 часот.
„Врба“ е во официјалната програма на фестивалот помеѓу други 32 филма, од кои 24 се играни, а останатите 8 се документарни филмови.
„Врба“ е шестиот долгометражен филм на Милчо Манчевски. Во филмот игра млада актерска екипа: Никола Ристески, Сара Климоска, Наталија Теодосиева, Ненад Нацев, Камка Тоциновски. Во останатите улоги се Петар Мирчевски, Благој Чоревски, Ратка Радмановиќ, Ана Костовска, Лазе Манасковски, Катина Иванова, Кире Ѓоревски, Адем Карага, Јелена Јованова-Периќ и други. Музиката ја потпишува Кирил Џајковски, дизајнер на продукција е Дејвид Манс, директор на фотографија е Тамаш Добош, а продуцент на филмот е Јане Ќортошев. Филмот е во продукција на „Банана филм“ и е македонско-унгарско-белгиска копродукција, со учество и на Албанија.