Околу 40 јужнокорејски ученици ја тужат Владата оти државниот приемен испит завршил 90 секунди порано од предвиденото. Тие бараат за секого по 20 милиони вони (околу 14.000 евра) како отштета за едногодишното чекање за повторно полагање.

Резултатите од овогодишниот испит беа објавени на 8 декември. Во тужбата, поднесена вчера од најмалку 39 ученици, се тврди дека ѕвончето заѕвонило порано во главниот град Сеул, за време на тестот по корејски јазик - првиот предмет. Некои ученици веднаш се побуниле, но велат дека наставниците сепак им ги одзеле писмените тестови. Наставниците си ја препознале грешката пред почетокот на следниот час и им дозволиле на учениците да искористат минута и половина по паузата за ручек, но адвокатот на тужителите тврди дека грешката влијаела врз натамошниот тек на испитот.

Озлогласениот приемен испит „Сунеунг“ за на Државниот колеџ во Јужна Кореја е осумчасовен систем со тестови по повеќе предмети. Се работи за еден од најтешките испити во светот, па влогот е многу голем. Тоа не само што одредува места на универзитетите и работни места, туку и идните општествени односи во државата.