Мигрената е многу повеќе од обична главоболка. Тоа е нарушување на нервниот систем кое може да истошти. Луѓето кои имаат мигрена доживуваат силна мачна или пулсирачка болка, обично на едната страна од главата. Болката е често придружена со гадење, повраќање и екстремна чувствителност на светлина или звук. Нападот може да трае со часови или денови, а за да се олесни страдањето, некои луѓе поминуваат време изолирани во темни, тивки простории.

Се проценува дека околу 800 милиони луѓе во светот имаат мигрени, а повеќето од нив се жени. Истражувањата покажуваат и дека мигрените се јавуваат почесто кај жените, посилни се и подолго траат во споредба со мажите. Освен тоа, жените кои имаат мигрени почесто имаат и други здравствени проблеми како анксиозност и депресија.

Зошто мигрените почесто се јавуваат кај жените?

Постојат неколку фактори зошто мажите и жените различно ги доживуваат нападите на мигрена, меѓу кои се хормоните, генетиката и животната средина. Хормоните естроген и прогестерон, преку различни механизми, играат улога во регулирањето на многу биолошки функции. Тие влијаат на различни хемикалии врз мозокот и може да придонесат за функционални и структурни разлики во одредени мозочни региони кои играат улога во нападите на мигрена.

Дополнително, половите хормони можат брзо да ја променат големината на крвните садови, што може да ги зголеми шансите за напади на мигрена. Во текот на детството и момчињата и девојчињата имаат еднакви шанси да доживеат мигрена. Но, кога девојчињата ќе достигнат пубертет, нивната веројатност да добијат мигрена се зголемува поради различните нивоа на полови хормони.

Мигрени за време на бременост и перименопауза

За жените кои се бремени мигрената може да биде особено исцрпувачка во текот на првиот триместар, време кога утринските мачнини се вообичаени, што го отежнува јадењето, спиењето или хидратацијата. Уште полошо, пропуштањето или прескокнувањето на некоја од овие работи може да ја зголеми веројатноста за појава на мигрена.


Добрата вест е дека мигрените генерално имаат тенденција да се намалуваат во текот на бременоста. Кај некои жени тие исчезнуваат, особено како што бременоста напредува. Но, кај оние кои ги доживеале за време на бременоста мигрените имаат тенденција да се зголемуваат по породувањето. Ова може да се должи на намалувањето на нивото на хормоните, како и на недостаток на сон, стрес, дехидрација и други фактори поврзани со грижата за доенчето.

Нападите на мигрена може да се зголемат и за време на перименопаузата, преодната фаза на жената кон менопауза. Но, како што напредува менопаузата, мигрената генерално се намалува.

Мигрените кај мажите

Појавата на мигрените малку се зголемува кај мажите во раните 20-ти години. Тие имаат тенденција да се намалат потоа и повторно да го достигнат својот врв околу 50-тата година од животот, пред повторно да се намалат или целосно да престанат.

Зошто тоа се случува не е добро разбрано, иако комбинацијата на генетски фактори, влијанија од околината и избор на начин на живот може да придонесе за порастот.

Извор: Science alert
Насловна фотографија: Pixabay