Во првото тримесечје од 2023 година во Македонија имало 9.467 слободни работни места, објави Државниот завод за статистика.

Највисока стапка на слободни работни места од 3,70% има секторот административни и помошни услужни дејности, додека најмала е стапката во секторот снабдување со електрична енергија, гас, пареа и климатизација, во кој изнесува 0,45%. Не гледајќи ја стапката, податоците за слободни работни места според сектори на дејности покажуваат дека во првите три месеци од годинава најмногу работници недостигале во преработувачката индустрија (2.424), трговијата на големо и трговија на мало; поправка на моторни возила и мотоцикли (1.777) и административни и помошни услужни дејности (840).

Деловните субјекти со број на вработени од 3 до 9 имаат највисока стапка на слободни работни места, која изнесува 2,20%. Истовремено, ако се фокусираме само на бројот, а не на стапката, најмногу слободни работни места имало во деловните субјекти со 50 до 249 вработени, вкупно 3.003.

Пелагонискиот Регион има највисока стапка на слободни работни места, која изнесува 2,93% и таму во првото тримесечје од годинава имало 1.527 непополнети работни позиции. Инаку, според бројот, најмногу слободни работни места имало во Скопскиот Регион, вкупно 4.297.