Американската држава Џорџија планира да изгради огромен далновод за напојување дата-центри, поради што десетици семејства би можеле да останат без своите домови. Енергетската компанија „Џорџија пауер“, со поддршка на државата, има намера да сруши триесетина куќи и да преземе стотици парцели, а на сопствениците што нема да се согласат на откуп им се заканува експропријација, пишува „Футуризам“.

Инфраструктура за дата-центри

Проектот е одговор на сè поголемите енергетски потреби на технолошката индустрија, а доаѓа во момент кога десетици градови низ САД се противат на градбата на дата-центри поради нивната огромна потрошувачка. Планираниот далновод ќе биде долг 1.600 километри и ќе пренесува речиси 10.000 мегавати електрична енергија од нова централа. Според официјалните податоци, дури 80 проценти од таа енергија се наменети за дата-центри, додека остатокот би требало да се распредели на локалните компании и домаќинства.

Компанијата „Џорџија пауер“ им нуди откуп на земјиштето на сопствениците, но доколку преговорите не успеат, можна е и присилна продажба на имотот со повикување на јавен интерес. Жителите, главно од руралните делови на Џорџија, се противат на планот според кој би требало да ги напуштат своите домови за да се обезбеди простор за инфраструктурата која ќе ги напојува системите за вештачка интелигенција.

Енсли Браун, чија семејна куќа се нашла на трасата на далноводот, на социјалните мрежи се обиде да предупреди за ситуацијата.

Неизвесна судбината на жителите

Брајан Џек, локален пратеник во Конгресот и поранешен политички директор на Белата куќа за време на мандатот на Доналд Трамп, потврди за „Форчун“ дека примиле многу повици за помош од граѓани со чиј имот располага „Џорџија пауер“. Изборниот округ на Џек опфаќа голем дел од погодените имоти.

Во случајот на семејството на Енсли Браун, се чини дека приказната е завршена.