Јапонија е позната по културата на прекувремено работење, па така мнозинството Јапонци поминуваат долги часови во канцеларијата. По долгиот работен ден некои се опуштаат одејќи во локални барови.

Но, по многу пијалаци, тие понекогаш го пропуштаат возот до дома и немаат друг избор освен да спијат на улиците на градскиот центар.

Фотографот Павел Јазчук успеал да го документира овој феномен, правејќи фотосерија што подоцна ја претворил во книга која ја нарекол „Висока мода“. Фотографиите покажуваат колку е јасна јапонската корпоративна култура.


Неговите фотографии покажуваат бизнисмени што одлучиле да дремнат на градските клупи, огради и на подземните платформи. Колку повеќе фотографирал, толку почесто го среќавал овој феномен. Тој вели дека знаел каде да ги бара, така што потрагата секогаш била плодна.

- По неколку истражувања знаев во кои области ќе бидат бидејќи не можат да се најдат насекаде - раскажува Павел.


Неговата книга била објавена во 2018 година.

- Прво се појавува визуелниот дел, а пораката доаѓа подоцна - вели Јазчук.


Извештај од 2016 година покажува дека повеќе од 20 отсто од луѓето во анкетата спроведена меѓу 10.000 Јапонци изјавиле дека работеле најмалку 80 часа прекувремена работа на месечно ниво.

Терминот „инемури“ што во превод значи „спиење за време на должност“ или „спиење додека е присутен“ го опишува културниот феномен во Јапонија што го фали спиењето во јавноста, што подразбира дека еден вработен работел до исцрпување.


Феноменот „кароши“ датира од ерата по Втората светска војна, од 50-тите години. Решен да ја обнови јапонската економија, тогашниот премиер Шигеру Јошида ги повикал големите корпорации да ги поттикнат работниците да посветат повеќе време на нивната работа. Планот очигледно функционирал бидејќи денес јапонската економија е трета по големина во светот. Но, несаканиот ефект беа болести поттикнати од големите нивоа на стрес и исцрпеност. Мозочните удари и инфарктите станаа почести кај јапонските работници.