Националната опера и балет премиерата ја најави како спој на визуелната иновација со традицијата, виртуелна сценографија која ќе ја одведе публиката во светот на древниот Египет

Со премиера на „Аида“ од Џузепе Верди, во Националната опера и балет вечерва во 20 часот ќе почнат 47. Мајски оперски вечери. Со истата претстава традиционално на 31 мај ќе биде затворен фестивалот на оперска музика. Операта е во продукција на театарот „Карло Феличе“ од Џенова.


Уметничкиот директор на Операта, Бисера Чадловска, рече дека се работи за ново, футуристичко видување на „Аида“, во која ќе има 3Д-проекции. Постановката ја видела на премиерата во Џенова и во соработка со театарот „Карло Феличе“ целата продукција е донесена во Скопје. „Аида“ ќе биде изведена и на затворањето на фестивалот, но со интернационална екипа.

Насловниот лик ќе го игра Благица Поп-Томова, а на 31 мај - Русинката Олга Романко.
Диригент на претставата е Енрико Довико, кој вели дека е многу задоволен од Оркестарот на НОБ затоа што „го следеле перфектно и дисциплинирано“. Различно во однос на изведбата на матичната сцена во Џенова е тоа што оркестарот не е целосно на сцена, туку е дел во т.н. оркестарска школка. Италијанскиот диригент нагласува дека претставата е микс на традиционално и модерно, а најголем предизвик е музиката да се координира со проекциите, односно тие да се приспособат на темпото.


Во придружната офф-програма од 15 мај до крајот на фестивалот ќе биде поставена изложбата „Божествена симбиоза“ посветена на првенката на Операта, Ана Липша-Тофовиќ (1926-2012), која е меѓу основоположниците на македонската оперска сцена, а била и дел од првата изведба на „Аида“ кај нас пред 65 години.

На 20 мај, пак, на платото на Националната опера и балет со видео на отворено ќе биде прикажана „Ана Болена“ од Доницети во изведба на Виенската државна опера, по повод 150 години од нејзиното основање.