Јадењето повеќе растителни влакна и цели зрна штити од болести како што е коронарната срцева болест, мозочниот удар, дијабетес тип 2 и колоректален карцином, укажува најновото истражување порачано од Светската здравствена организација.
Истражувачите ги разгледале и истражувањата низ 40 години, вклучително 185 набљудувачки истражувања со податоци што опфаќаат 135 милиони лица и 58 клинички испитувања, во кои биле вклучени 4.635 учесници.
Тие откриле дека јадењето најмалку 25 до 29 грама растителни влакна на ден дава значителни здравствени придобивки, намалувајќи ги и вкупните смртни случаи и инциденција на коронарна срцева болест, дијабетес тип 2 и колоректален карцином.
- Откривме дека количината на растителни влакна е поврзана со изненадувачки широк спектар на релевантни болести - срцеви заболувања, дијабетес тип 2 и колоректален карцином, како и со смртноста - повисоки дози на влакна доведуваат до намален број случаи со вакви заболувања - вели водечкиот автор Ендрју Рејнолдс, постдокторски научен соработник на Одделот за медицина на Универзитетот во Отаго, Нов Зеланд.
- Со споредување на двете испитувања и анализа на широк спектар на здравствени резултати ја зголемивме довербата дека односите помеѓу растителното влакно и целото зрно и намалената неинфективна болест најверојатно ќе бидат причинско-последични, а не последица на збунувачки варијабли - вели тој.
Иако упатствата за исхрана издадени од професионалните организации поттикнуваат зголемена потрошувачка на зеленчук, овошје и цели зрна, има помалку квантитативни упатства во врска со изворот и внесувањето на растителните влакна и скроб.
- Внесувањето јаглехидрати е прилично редовна тема во медиумите, а најголем дел од вестите се фокусираат на количеството јаглехидрати што треба да се јадат; сепак, шеќерите, скробот и влакната се јаглехидрати што извршуваат различна улога во телото. Имајќи го ова на ум, можеби е премногу едноставно за да се разгледа вкупната количина јаглехидрати - вели Рејнолдс.
- Поради оваа причина, нашата работа го зема предвид квалитетот на
јаглехидратите што ги јадеме, користејќи многу повеќе достапни информации отколку што биле направени претходно - додава тој.