Министерот за надворешни работи Бујар Османи вели дека е исконтактирано со грчката страна околу важноста на личните документи кои треба да се заменат до 12 февруари, но апелира наместо иницијативи за одложување за користење политички поени, фокусот да се стави на вадењето документи.

- Договорот од Преспа е меѓународен договор. Мислам дека наместо да се концентрираме на давање лажна надеж на граѓаните дека ќе ги смениме одредбите од Преспанскиот договор и ќе го смениме Законот за спроведување на уставните амандмани, да работиме граѓаните да немаат пречки по 13 февруари, да се забрза издавањето пасоши, да почнат налепниците да се лепат на регистарските таблички. Мислам дека ова е поздраво да им се каже на граѓаните, дека ова е обврска што се провлекува пет години и да се обидеме до 13 февруари максимално да ги средиме документите на граѓаните. Така што, сметам дека овој пристап е поздрав отколку добивање политички поени за нешто што нема да можеме да го направиме, ниту оваа претставка до Уставен суд нема да може да го смени Преспанскиот договор ниту кои било измени на законите - рече Османи.

Соопшти дека имал средба со грчката амбасадорка и меѓуинституционална координација со министерствата за внатрешни работи и за транспорт за да се разгледаат сите предизвици што може да се јават по 12 февруари со цел да им се излезе во пресрет на граѓаните.

- Се договоривме да бидеме во секојдневна комуникација со грчката страна за граѓаните да не се соочат со проблеми по 13 февруари во однос на транспортерите, во однос на сообраќајните дозволи, во однос на пасошите. За личните карти, МВР информираше дека законот заглавил во Собранието. Тие рокови не се пресликани во Законот за лични карти и затоа личните карти може да се користат за домашна употреба, меѓутоа, за патните исправи и за другите документи и во Уставниот закон и во останатите законски решенија, рокот е пет години од стапување во сила, а тоа е 13 февруари - појасни Османи.

Додаде дека МНР ќе стори сѐ што е во негова моќ за да нема нетретирани предизвици по 13 февруари.

- Како министер за надворешни работи, лично сметам дека е пофер да им се каже на граѓаните дека имаме обврска. Ајде да се организираме да помине без многу тешкотии отколку да им се дава лажна надеж на граѓаните дека ќе се одложи рокот. Гледаме дека метежот се намалува во одредени делови. Да ги ставиме сите институционални сили на располагање за да им олесниме на граѓаните да немаат никакви проблеми при патување по 13 февруари - нагласи Османи.

Посочи дека има целосно разбирање од грчката страна за техничките аспекти во процесот и дека се разговара за сите детали, од тоа колку часови луѓето чекаат и зошто е тоа така, меѓутоа, како што додаде, обврските од меѓународниот договор остануваат. Грчката страна, рече Османи, треба да ја информира ЕУ дека стапува во сила рокот и потоа сите држави што ќе ја примат таа информација, ќе почнат да ја почитуваат.