Возењето велосипед е одлично и за физичкото и за менталното здравје. Освен тоа, ова превозно средство најмалку ја загадува природната средина.

- Една од најважните придобивки од оваа активност е позитивното влијание врз срцето и циркулаторниот систем. За време на возењето велосипед голем број мускулни групи се вклучени во циклични движења, додека циркулаторниот и респираторниот систем се постојано под стрес. Освен тоа, возењето велосипед го намалува ризикот од најчестите болести: болести на циркулаторниот систем, рак, дијабетес и помага во борбата против стресот и депресијата. Истражувањата покажуваат дека умереното возење велосипед трипати неделно го намалува крвниот притисок и нивото на холестерол во крвта, со што значително го намалува ризикот од срцеви заболувања, а е корисно и за превенција од остеопороза - вели д-р Андрија Штампар.

Докторот додава дека возењето велосипед ги зајакнува, зацврстува и обликува мускулите на нозете и задникот, а се зајакнуваат и стомачните и грбните мускули што го поддржуваат 'рбетот.

За разлика од трчањето, кога човек вози велосипед не им предизвикува стрес на зглобовите на нозете, колената и 'рбетот.

Во продолжение ви нудиме уште неколку добри причини зошто треба да возите велосипед секој ден.

Создава рамнотежа во метаболизмот

Возењето велосипед помага во регулирањето на телесната тежина, согорувањето калории и слабеењето и создава рамнотежа во метаболизмот. Побрзото и понапорно возење придонесува за губење на тежината. Експертите препорачуваат да возите велосипед по 50 минути секој ден доколку сакате да изгубите тежина и да го забрзате метаболизмот. Со текот на времето можете да го забрзате темпото на возење и/или да барате потешки патеки за возење.

Возењето велосипед релаксира и го намалува стресот

Возењето велосипед ја намалува напнатоста, го зголемува лачењето на ендорфинските хормони што влијаат врз доброто расположение. Исто така, го подигнува нивото на енергија за 20 отсто и го намалува количеството на акумулиран замор за 65 отсто бидејќи го стимулира мозокот да лачи хормон поврзан со количината на енергија - допамин. Возењето велосипед е здраво и ги прави луѓето посреќни.

Возењето велосипед придонесува за почист воздух

25-минутно возење со велосипед на дневно ниво наместо возење автомобил може да ја намали емисијата на јаглероден диоксид за 165 килограми на годишно ниво.

Извор: 6yka.com
Фото: Freepik