Во Италија уште едно лице почина од новиот коронавирус, со што вкупниот број на починати сега изнесува четири. Како што пренесува италијанската агенција Анса, станува збор за 84-годишен маж од Ломбардија кој бил хоспитализиран во Бергам и имал хронични болести.
Досега во Италија од новиот коронавирус наречен Ковид-19 се заразени 165 лица, претежно во покраините Ломбардија и Венето, во Северна Италија.
Во меѓувреме, министерството за образование и наука на Хрватска издаде препорака до сите училишта, поради коронавирусот, да ги откажат патувањата во Италија. Оваа препорака е во согласност со таа на министерството за здравство и се издава заради безбедност на учениците и наставниците.
- Ве советуваме во наредните неколку месеци да ги откажете организираните патувања во Италија - се наведува во соопштението од ресорното министерство.
Според властите во Загреб, сè уште не е забележан ниту еден потврден случај во Хрватска на лице заразено со Ковид-19.
Драстичните мерки на италијанските власти за коронавирусот предизвикаа паника кај голем дел од европското население, Европската комисија бара секоја одлука да се заснова на научни докази.
- Одблиску ја следиме ситуацијата во Италија, овој брз развој на настаните покажува колку бргу се менуваат работите, ситуацијата во Италија предизвикува загриженост и покажува колку е важно земјите-членки на ЕУ да бидат подготвени доколку се појави слична ситуација - изјави европската комесарка за здравство Стела Кириакидис.
Фото: МИА
Во Италија, меѓутоа, последните случувања послужија и како политичка платформа за популисти, како поранешниот министер за внатрешни работи Матео Салвини, да повикаат за спречување на миграцијата, патувањата и воведување гранични контроли во шенген-зоната.
Ако ваквите одлуки се исклучиво прерогатив на земјите-членки, а не на Европската комисија, таа сепак бара секое решение да биде втемелено врз сериозни научни докази и евалуации на релевантните власти како Светската здравствена организација (СЗО).
- Би било многу жално оваа ситуација да се политизира, она што е сега потребно е кога се дискутира за мерките, вклучително и граничните контроли, тие да се засноваат на кредибилни процени на ризикот и на научни докази, мерките треба да бидат пропорционални и да се носат во координација со другите земји, треба да настапиме како заедница - изјави на прес-конференција еврокомесарот за хуманитарна помош Јанез Ленарчич.
Засега од СЗО нема нови препораки во однос на рестрикцијата на патувањата и движењата во Европската Унија. Секоја земја-членка одлучува за себе какви мерки ќе воведе, додека институциите на ЕУ се задолжени за препораки за своите вработени. Европската комисија уште во јануари им препорача на вработените да ги откажат сите патувања во и од Кина, Макао и Хонг Конг доколку не се неопходни.
Здравствено-безбедносниот комитет на ЕК утрово одржува седница на која се разгледуваат последните случувања во Италија и по која ќе бидат информирани медиумите дали се планираат нови мерки или нови препораки до земјите-членки.
Комесарот Ленарчич повтори дека оваа епидемија несомнено ќе има последици врз глобалната економија и трговија, но дека во овој момент врвен приоритет е здравјето на граѓаните и сите мерки треба да се носат согласно тој приоритет, пред сѐ.
Европската комисија денеска најави и нова финансиска помош за справување со заразата од Ковид 19 во износ од 232 милиони евра: 114 милиони се наменети за поддршка на СЗО, 15 милиони се наменети специфично за помош на африканскиот континент, 100 милиони за медицински истражувања и вакцини и конечно 3 милиони евра за репатријација на лица од Кина.
- Со над 2.600 изгубени животи, немаме друг избор освен да се подготвиме на секое ниво, нашата нова помош ќе ѝ помогне на Светската здравствена организација да осигури дека земјите со послаби здравствени системи нема да бидат изоставени, нашата цел е да се спречи епидемијата на глобално ниво - изјави комесарот Ленарчич.
Извор: МИА