Што е црвено однадвор, виолетово однатре и ви овозможува пристап до 195 дестинации низ светот без виза?
Тоа е сингапурскиот пасош, кој е прогласен за најмоќниот документ во светот во кварталното рангирање на пасошите со најголемо меѓународно влијание.
Во изминатите 19 години Индексот за пасош на Хенли, создаден од лондонската советодавна фирма за глобално државјанство и престој, „Хенли & партнерс“, ги следи глобалните слободи во 227 земји и територии низ целиот свет, користејќи ексклузивни податоци од Меѓународната асоцијација за воздушен простор.
Пасошите што наскоро ќе се приближат до глобалната моќ на Сингапур се оние на Јапонија, Германија, Франција, Италија и Шпанија, кои заедно го држат 2. место и чии граѓани уживаат безвизно патување до 192 дестинации во светот.
На 3. место доаѓаат Јужна Кореја, Шведска, Финска, Австрија, Ирска, Луксембург и Холандија, чии граѓани безвизно патуваат до 191 дестинација.
Велика Британија, која во 2014 година го држеше првото место заедно со САД, сега е на 4. место заедно со Нов Зеланд, Норвешка, Белгија, Данска и Швајцарија.
Австралија и Португалија го делат 5. место со 189 дестинации, додека САД паднаа на 8. место со безвизен пристап до скромни 186 дестинации.
Додека магичната бројка од 195 на Сингапур е рекордно високо ниво и за Сингапур и за рангирањето, на другиот крај на скалата се забележуваат нови падови. Авганистан долго време беше рангиран како најслабиот пасош во светот според Индексот, но сега неговите граѓани можат да патуваат само во 26 земји без виза - најниската оцена забележана во историјата на Индексот од речиси две децении.
- Глобалниот просечен број на дестинации кои патниците можат да ги посетат без виза е речиси двојно зголемен од 58 во 2006 година на 111 во 2024 година. Сепак, глобалниот јаз во мобилноста меѓу горниот и долниот дел на Индексот сега е поголем од кога било - вели Кристијан Каелин, претседател на „Хенли & партнерс“.
Новото истражување спроведено од „Хенли & партнерс“ ги споредува стапките на одбивање шенген-визи за африканските апликанти со оние од други региони.
- Европскиот визен систем јасно демонстрира однапред одредена пристрасност кон африканските апликанти кои се соочуваат со троен удар: помала моќ на пасошот, повисоки стапки на отфрлање визи и ограничена економска мобилност - вели Мехари Тадел Мару, помошен професор на Европскиот универзитетски институт и Универзитетот „Џонс Хопкинс“ во Италија.
Нашата земја се најде на 41. место и Македонците можат безвизно да патуваат до 128 дестинации.
Извор:
CNN
Фото: Freepik