„Јутјуб“ почнува соработка со „Трибека“, „Кан“, „Санденс“ и други фестивали за да понуди бесплатен филмски фестивал на својата платформа од 29 мај до 7 јуни.

Фестивалот ќе биде продуциран и организиран од „Трибека ентерпрајзес“ и во негови рамки ќе бидат прикажани долгометражни, кратки, документарни филмови и панел-дискусии од програмите на 20 светски фестивали, вклучувајќи ги оние во Кан, Венеција, Берлин, Торонто и Токио.


Фестивалот ќе биде бесплатен за целата јавност и нема да вклучува реклами. Гледачите ќе бидат охрабрени да придонесат за помош на погодените од коронавирусот со донации кои ќе бидат собрани од фондацијата на Обединетите нации. Сè уште не е објавена филмската програма.

Џејн Розентал од „Трибека ентерпрајзес“ изјавува дека настанот ќе им даде на гледачите слика за уникатноста на секој фестивал.


Поради пандемијата на коронавирусот, беа откажани или одложени многу филмски фестивали, иако некои фестивали се обидуваат да ги организираат настаните онлајн.

Извор: digitaltrends.com