Стресот е физичка и емоционална реакција на настан кој го доживуваме како вознемирувачки или во некои ситуации опасен. Секој на свој начин се справува со стресот и соодветно на тоа постојат различни модели на борба против него. По стресно искуство, на едно лице ќе му треба психотерапија, а на друго само дополнителна физичка активност, престој во природа, разговор со пријател или контакт со вода. Некои експерти сметаат дека водата е вистински ментален еликсир, туширањето ги опушта мускулите на телото, но води и до конструктивно размислување.

Стресот може да се надмине и со бесмислени активности

Стресот е „зачинот на животот“ кој ни помага да станеме посилни, но во некои ситуации е причина и за пресилно активирање на кардиоваскуларниот, нервниот, ендокриниот и дигестивниот систем. Професорот по когнитивни науки Захари Ирвинг од Универзитетот во Вирџинија нѐ потсетува дека ослободувањето од секојдневниот стрес можеме да го најдеме во навидум бесмислени активности, како што се физички вежби, одење, миење садови и туширање. Ирвинг објаснува дека овие активности се перципирани од мозокот како нешто што не го бара нашето целосно внимание.

Момент на релаксација и доаѓање до нови идеи

Туширањето е совршено, не бара премногу когнитивен ангажман, тоа е период од денот кога сме сами. Не размислуваме за ништо и токму во тој момент може да дојдеме до решение или нова идеја.

-Ова се моментите од денот кога ни е супер досадно и истовремено го спречуваме умот да залута, на пример, проверувајќи ги пораките на телефонот - вели Ирвинг.

Психологот Џон Куниос од Универзитетот „Дрексел“ верува дека туширањето, миењето на забите, бричењето, миењето на косата се делови од денот кога сме отсечени од светот.

Во труд од 2014 година Куниос и неговите колеги ја проучувале активноста на мозокот на луѓето кои решавале тестови за асоцијација. Забележано е дека кај некои луѓе, неколку секунди пред решението, доаѓа до наплив на алфа-бранови кои се изразуваат кога сме опуштени, кога размислуваме бавно и во медитативни состојби. Овие алфа-бранови ни помагаат да закрепнеме од стресот и имаат смирувачки ефект врз телото.

Кога ги затвораме очите за време на длабоко размислување или гледаме во една точка, всушност се ослободуваме од надворешните и внатрешните дразби што го одвлекуваат вниманието.


Лесното одење е еден од начините да се ослободите од напнатоста и истовремено да најдете решение за проблемот. Проф. Џонатан Скулер потсетува дека древните филозофи како Платон дошле до нови идеи на овој начин.

Аристотел бил основач на перипатската школа, името потекнува од грчкиот збор „перипатос“ што значи одење. Во ова училиште мислителите разменувале идеи и ставови за време на „прошетка“. Акцентот бил ставен на практичната примена на филозофските идеи во животот. Современите психолози советуваат кога сме напнати, да излеземе на кратка прошетка и на тој начин малку да си ги расчистиме мислите.

Исклучете го мобилниот

И покрај тоа што понекогаш се чини невозможно, експертите велат да се обидеме да го исклучиме мобилниот телефон на неколку минути и да се оддалечиме од лоши вести. Проф. Ирвинг вели дека нема  спонтаност во модерната култура, при што телефоните честопати се бариера за талкање на креативниот ум. За да се опуштите што повеќе и да смислите креативна идеја, исклучете го барем ѕвонењето на телефонот, велат експертите.

Престојот во природа, посетата на изложба, театарска претстава, книга, филм се добри начини да се оттргнете од брзото темпо на живот и да се обидете да најдете мир, барем на 5 минути.

Извор: eklinika.telegraf.rs

Фото: Freepik