Девојка на 28-годишна возраст добила тромботична реакција на крвта откако пред шест или седум дена во Србија ја примила првата доза од вакцината против Ковид-19 на „Астра зенека“. Ова денеска го потврди министерот за здравство Венко Филипче при посета на еден од пунктовите за вакцинација во поликлиниката „Јане Сандански“ во Скопје.

- Кај нас има еден случај на девојка која има 28 години и од вчера се наоѓа на болничко лекување со тромботичен ефект, се вакцинирала со „Астра зенека“ во Србија. Реакцијата се случила шест до седум дена по вакцинацијата, а таа немала претходни заболувања - истакна Филипче.

Според него, тромботична реакција настанува како резултат на реакција на тромбоцитите, со што се создава згрутчување на крвта.

- Ова се ретки случаи, но треба да бидеме внимателни -вели Филипче.

Според него, засега нема никакви препораки дека нешто превентивно треба да се направи ако некој ја примил едната доза на вакцината на „Астра зенека“.

- Сите што се вакцинирани ќе бидат ревакцинирани согласно препораките кои ги очекуваме во следниот период - додава Филипче.

Но, сепак, потврди дека во Македонија нема да се почне со вакцинација со оваа вакцина на лица помлади од 60 години додека не се добијат сите анализи.

- Одлучивме да бидеме внимателни и да одиме полека, но сигурно. Ќе чекаме дефинитивна потврда од германското министерство за здравство дали вакцината е безбедна. Истовремено имаме состаноци со Агенцијата за лекови, а ќе се обратиме и до Европската агенција за лекови - додаде тој.

Инаку, денеска почна вакцинација на 20.000 граѓани на возраст над 77 години со хронични болести.

Филипче уверува дека нема регистрирани несакани ефекти од оваа вакцина кај постарите лица.