Загадувањето на воздухот може да го замислиме како проблем на отворено од издувни гасови од автомобилите и смогот. Но, ако воздухот во нашите домови е загаден, тоа може да влијае врз нашето здравје.

Во Австралија, околу 12 проценти од детската астма може да се припише на шпоретите на гас и токсичните хемикалии што тие ги испуштаат во воздухот. И додека расте притисокот за постепено исфрлање на користењето гас во затворени простории, околу 38 проценти од австралиските домаќинства се потпираат токму на природен гас за готвење.

Препорачаните интервенции, како што е замена на шпоретот на гас со електричен - можеби не се можни за оние што изнајмуваат апарати за домаќинство или се борат со трошоците за живот. Ова е важно бидејќи, како што покажува истражувањето, детската астма е почеста во социо-економски загрозените области.

Ако користите апарати за домаќинство на гас, еве како тоа може да влијае врз астмата на вашето дете и што можете да направите за да го подобрите квалитетот на воздухот.

Астмата е најчеста хронична состојба кај австралиските деца. Респираторната состојба погодува речиси 400.000 од оние на возраст од 14 и помлади - близу 9 проценти од таа возрасна група. Астмата ги стеснува дишните патишта и го попречува протокот на воздух. Многу луѓе се справуваат со состојбата со инхалатори. Но, тоа може да биде сериозно, па дури и фатално. Иако не постои единствена причина за астма - и внатрешното и надворешното загадување на воздухот играат значајна улога.

Печките на гас ослободуваат азот диоксид

Печките на гас што вообичаено се наоѓаат во австралиските домови испуштаат токсични хемикалии во воздухот. Тие вклучуваат јаглерод моноксид (CO), ПМ 2,5 (мали честички, често произлезени од чад), бензен, формалдехид и азот диоксид (NO2). Сите се штетни, но особено азот диоксидот е поврзан со развој и влошување на астмата.

Грејачите на гас, исто така, можат да произведат азот диоксид

Бидејќи азот диоксидот е невидлив гас, тешко е да се знае колку е присутен во воздухот дома. Сепак, едно американско истражување покажало дека во куќите со шпорети на гас може да има три пати повисоки нивоа на азот диоксид отколку во куќите со електрични шпорети. Ова е особено загрижувачко за домаќинствата со деца, со оглед на тоа што децата го поминуваат поголемиот дел од времето во затворени простории.

Дали аспираторите во кујната помагаат?

Употребата на високоефикасни аспиратори над плочата за готвење на гас може да помогне. Тие можат да заробат повеќе од 75 проценти од загадувачите на воздухот и да ги исфрлат надвор.


Природна вентилација

Постои бесплатен начин за вентилација на вашиот дом. Ако ги отворите прозорците за време и по готвењето, тоа ќе го зголеми протокот на воздух, а доказите покажуваат дека може да го подобри севкупниот квалитет на воздухот. Сепак, тоа не е секогаш можно, особено во постудените месеци од годината.


А што е со греалките?

Како и готвењето со гас, греалките на гас испуштаат штетни материи во воздухот, вклучително и азот диоксид.

Ако не можете да го замените вашиот грејач на гас со, на пример, електрична греалка, не користете го преку ноќ во просторијата каде што спиете вие или вашите деца.

Астмата не може да се излекува, но нејзините симптоми може да се контролираат. Подобрувањето на квалитетот на воздухот, дури и во изнајмен или стар дом, може да им помогне на луѓето со астма полесно да дишат.

Извор: medicalxpress.com

Фото: Freepik