Со одлука на Управниот одбор на Стопанската комора на Република Северна Македонија формиран е Совет за унапредување на високото образование и стратешки истражувања на Комората, на чие чело на предлог на претседателот на Комората, Бранко Азевски, за претседател е избран универзитетскиот професор Марјан Ѓуровски од Универзитетот „Св. Кирил и Методиј“ во Скопје.

За членови на Советот се избрани: проф. д-р Игор Неделковски, ректор на Универзитетот „Св. Климент Охридски“ - Битола, проф. д-р Дејан Мираковски, ректор на Универзитетот „Гоце Делчев“ - Штип, проф. д-р Мијалче Санта, декан на Економски факултет при УКИМ Скопје, проф. д-р Веланд Рамадани, проректор на Универзитет на ЈИЕ Скопје, проф. д-р Јасминка Талевска Бунеска, Универзитет „Св. Климент Охридски“ - Битола, проф. д-р Брикенд Азири, декан на Економски факултет на Државниот универзитет о Тетово, проф. д-р Дарко Данев, Машински факултет при УКИМ Скопје, доц. д-р Бујамин Бела, проректор на Универзитет „Мајка Тереза“ - Скопје, д-р Ристо Јаневски, ОКТА АД Скопје, Василка Салевска, Филип Морис, Скопје, Никица М. Блажевска, Македонија 2025, Марина Бадаревска, Фламинго Гевгелија, Николче Мариновски, Кули, Прилеп.

Првата активност на Советот ќе биде в петок, 5.6.2026 година, кога ќе се одржи конференција на тема „Од диплома до компетенции: новата улога на универзитетите преку поврзување на академијата и економијата“.
Во услови на динамични економски и технолошки промени, потребата од силна, функционална и стратешка поврзаност помеѓу високото образование и бизнис-заедницата станува суштинска за одржливиот развој на економијата. Во таа насока, Советот за унапредување на високото образование и стратешки истражувања има цел да воспостави системски пристап кон интеграција на академскиот и реалниот сектор преку креирање политики, иницијативи и активности кои ќе овозможат создавање на конкурентен, стручен и применлив кадар, нагласува универзитетскиот професор Ѓуровски, претседател на Советот.

Усогласување на студиските програми со потребите на стопанството

Неговата мисија е да развие одржлива платформа за соработка помеѓу универзитетите и бизнис-заедницата, преку унапредување на квалитетот на образованието, поттикнување применети истражувања и развој на вештини кои одговараат на реалните потреби на пазарот на труд. Покрај тоа, визијата на новиот Совет за унапредување на високото образование и стратешки истражувања е создавање интегриран екосистем во кој образовните институции и компаниите заеднички придонесуваат кон економски раст, иновации и зголемена конкурентност, во согласност со европските стандарди и трендови.
Во рамките на своето дејствување, според универзитетскиот професор Ѓуровски, поставени се неколку клучни стратешки цели: усогласување на студиските програми со потребите на стопанството, зголемување на вработливоста на младите, поттикнување заеднички истражувачки активности, развој на практични и применливи вештини, како и јакнење на иновацискиот капацитет на економијата. Дополнително, Советот ќе придонесе кон подобрување на дијалогот помеѓу институциите, академијата и приватниот сектор, со цел креирање политики базирани на податоци и реалните потреби.
Покрај тоа, изразувајќи благодарност за предлогот од претседателот на Комората, Бранко Азевски, за укажаната чест и обврска, како и изборот од страна на Управниот одбор, професорот Марјан Ѓуровски нагласува дека клучните задачи на Советот опфаќаат анализа на јазот помеѓу понудата на кадар и побарувачката на пазарот на труд, иницирање реформи во наставните програми, воспоставување механизми за практична настава и стажирање, како и поддршка на заеднички истражувачки и развојни проекти. Советот ќе има и советодавна улога во процесот на креирање образовни и економски политики, со фокус на долгорочен развој.

Национална платформа за интеракција помеѓу универзитети и компаниите

Како оперативен инструмент за реализација на овие цели се предлага воспоставување национална платформа за соработка под назив „EDU-BIZ CONNECT MK“. Оваа платформа ќе функционира како централизирана рамка која ќе овозможи континуирана интеракција помеѓу универзитетите, компаниите, студентите и институциите. Таа ќе комбинира дигитални алатки и физички активности со цел создавање функционален мост помеѓу образованието и економијата. Платформата ќе се заснова на неколку програмски столбови. Првиот столб се однесува на академско-бизнис кокреирање, преку кое ќе се овозможи заедничко дизајнирање на наставните програми, вклучување експерти од индустријата во наставниот процес и формирање советодавни тела со претставници од бизнис-секторот. Вториот столб е практичната настава и дуалното образование, со воспоставување национален систем за практикантство и интеграција на работното искуство како задолжителен дел од студиите. Третиот столб опфаќа истражување и иновации, со фокус на развој на заеднички проекти помеѓу универзитетите и компаниите, поддршка на применети истражувања и создавање индустриски лаборатории. Четвртиот столб е насочен кон вработување и управување со таленти, преку креирање платформи за поврзување на студентите со работодавците, организирање кариерни настани и поддршка на млади таленти. Петтиот столб се однесува на доживотно учење, со развој на програми за преквалификација и доусовршување, како и креирање сертификати во соработка со бизнис-секторот. Шестиот столб е поврзан со политики и аналитика, преку изработка на редовни анализи за потребите на пазарот на трудот, идентификација на дефицитарни вештини и давање препораки за унапредување на образовните политики.
За ефективна имплементација, платформата ќе користи конкретни алатки како што се дигитални системи за поврзување на студенти и компании, секторски совети за вештини по индустрии, иновациски центри, централизирани портали за практикантство и организирање годишни форуми за дијалог помеѓу образованието и бизнисот.

Намалување на јазот помеѓу високото образование и пазарот на труд

Очекуваните резултати од воспоставувањето на Советот и платформата се намалување на јазот помеѓу образованието и пазарот на трудот, зголемување на вработливоста на младите, поголем број применети истражувања, подобрен квалитет на високото образование и зголемена конкурентност на домашната економија.
Со ова иницијатива и дејствување, Стопанската комора на Република Северна Македонија ја потврдува својата стратешка определба за активно вклучување во креирањето на политики и решенија кои ќе обезбедат синергија помеѓу образованието и бизнис-секторот, во интерес на долгорочниот економски и општествен развој.