Некогаш симбол на моќта, а денес „Синиот воз“ се користи за комерцијални цели. Секој што сака може да замине со него на „југоносталгична прошетка“.

Возот единствено се користел за превоз на Јосип Броз Тито, високи државни и политички личности и странски државници на патувања во земјата и во странство. Од 2005 година почнал да се користи за комерцијални цели и може да се изнајми за различни видови свечености, на пример, роденденски и корпоративни прослави, венчавки или за индивидуални патувања.

Сите заинтересирани можат да го разгледаат или фотографираат овој „музеј“ на шини и да слушнат еден дел од југословенската историја. Потребно е да се пријавите 24 часа претходно на srbijavoz.marketing@srbrail.rs или на телефонскиот број +381 11 3616-811.

Овој воз со право го носи епитетот „салонски“, бидејќи изобилува со луксуз и комфор. Осмислен е како целина за престој и за сите протоколарни активности на некогашниот претседател на СФРЈ.

Возот е произведен во 1959 година во фабриката за шински возила „Гоша“ во Смедеревска Паланка и во фабриката за вагони „Борис Кидрич“ во Марибор. Името му го дале работниците во фабриката бидејќи е обоен во сино, со цел да се разликува од другите во тоа време, главно зелени, композиции на Југословенската железница. Возот имал десет вагони на „Главниот воз“ и осум вагони на „Првиот воз“.

Претседателот Тито во „Синиот воз“ пречекал повеќе од 60 светски државници, а поминал повеќе од 600.000 километри во земјата и во странство.

Извор: МИА