Доктори во Канада се соочуваат со сѐ поголем број пациенти што имаат симптоми слични на Кројцфелд-Јакобова болест, ретка болест која го напаѓа мозокот и од која се умира за неколку години.

Кога докторите ги испитале пациентите, се збуниле бидејќи пациентите биле негативни на тестовите за повеќето познати заболувања на мозокот.

Пред речиси две години Роџер Елис од Канада имал напади и паднал. До тој момент тој бил прилично здрав и уживал во пензијата, по децении работење како индустриски механичар. По таа епизода, здравјето почнало да му се влошува.

- Почна да има халуцинации, да слабее, а стана и агресивен. Во еден момент повеќе не можеше да оди. За три месеци заврши во болница и лекарите ни рекоа дека умира, но дека не знаат зошто - вели неговиот син Стив Елис.

Лекарите првично претпоставувале дека станува збор за Кројцфелд-Јакобова болест. Оваа болест спаѓа во прионска болест. Кравјата спонгиформна енцефалопатија е варијанта на болеста. Симптомите на Кројцфелд-Јакобовата болест вклучуваат деменција, мускулни контракции, промени во однесувањето, тешкотии во координацијата и други оштетувања на нервниот систем, а смртта се јавува во рок од една до две години.

Починале две лица

Си-би-си, јавен радиодфиузен сервис во Канада, на почетокот од оваа година добил увид во јавно-здравствениот допис испратен до сите канадски медицински професионалци во кој се предупредува на бројот на пациенти со непозната дегенеративна мозочна болест.

- Првото нешто што го помислив е дека болеста е иста како таа на татко ми - вели Стив Елис.

Неврологот Алиер Мареро од Универзитетскиот болнички центар „Д-р Џорџ-Л-Думонт“ од Монктон вели дека лекарите првпат се соочиле со овие симптоми во 2015 година, но сметале дека станува збор за изолиран и нетипичен случај. Но, оттогаш се појавиле голем број пациенти со овие симптоми, доволно за да се каже дека не станува збор за изолиран случај, туку за непознат синдром.


Мистериозни симптоми

Повеќето пациенти од 2018 година почнале да имаат симптоми на оваа непозната болест, иако лекарите веруваат дека еден таков случај бил забележан и во 2013 година. Симптомите се различни и варираат од пациент до пациент. Отпрвин се случуваат промени во однесувањето, како што се вознемиреност, депресија и раздразливост, заедно со необјаснета болка, болки во мускулите и грчеви. Пациентите често имаат тешкотии со спиењето и проблеми со меморијата. Исто така, може да има проблеми со комуникациските вештини, како што се пелтечење, повторување или неправилен изговор на зборови.

Симптомите вклучуваат брзо губење на тежината и мускулна атрофија, како и нарушувања на видот и проблеми со координацијата и присилно грчење на мускулите. Многу пациенти по некое време можат да одат само со помош на патерици или инвалидска количка.

Некои пациенти имале вознемирувачки халуцинаторни соништа или будни аудитивни халуцинации. Неколку заболени имале епизоди на Капграсов синдром, психијатриско нарушување во кое едно лице верува дека измамник заменил некој што му е нему близок.

- Прилично е вознемирувачко затоа што еден пациент ѝ рекол на сопругата: „Извинете госпоѓо, не можете да легнете во креветот, јас сум оженет маж“. Кога сопругата му го кажала името, тој ѝ рекол дека таа не е неговата вистинска сопруга - вели Мареро.

Експертите ги тестираат пациентите за сите прионски и генски болести, тестирајќи ги за вируси, бактерии, габи, тешки метали и абнормални антитела. Тие ги анализираат факторите на животната средина, начинот на живот, патувањата и историјата на медицината. Досега тие не беа во можност да ја откријат причината за симптомите.

Во моментов нема лек за оваа болест, освен што на пациентите може да им се помогне со ублажување на симптомите.

Веројатно не станува збор за генско заболување

Лекарите засега сметаат дека болеста е стекната и не е генска.

- Нашата прва заедничка хипотеза е дека има токсичен елемент во околината што предизвикува дегенеративни промени -  вели Мареро.

Некои веруваат дека станува збор за хронична изложеност на таканаречен „ексцитотоксин“ како домоична киселина, поврзана со инцидент со труење со школки од 1987 година.

Експертите разгледуваат и друг токсин, аминокиселината БМАА, за која се смета дека е поврзана со развојот на Алцхајмерова и Паркинсонова болест.

Здравјето на Роџер Елис се стабилизирало по првата епизода. Сега е во специјализиран дом за стари лица и има потреба од помош за секојдневни активности. Има проблеми со спиењето и комуникацијата.

Извор: BBC
Фото: Freepik