Истражувачи од Проектот за чистење на океанот и Универзитетот „Вагенинген“, од Холандија, преку земање примероци и тестирање открија дека повеќе од 90 отсто од препознатливото ѓубре во Големиот пацифички тепих од ѓубре доаѓа од само шест земји, од кои сите се големи индустријализирани рибарски нации. Нивното истражување го објавија во „Сајентифик рипортс“.
Претходните истражувања покажаа дека има огромен остров од ѓубре што лебди на врвот на суптропската обвивка во Северниот Тихи Океан. Научниците процениле дека има десетици илјади тони ѓубре, поголемиот дел пластика, што опфаќа милиони квадратни километри. Постоењето на Големиот пацифички тепих од ѓубре се најде на насловните страници на многу медиуми во последниве години, иако изворот на ѓубрето досега не беше идентификуван.
Фото: The Ocean Cleanup
Истражувачите откриле дека приближно една третина од парчињата ѓубре не може да се идентификуваат - тие не можеле да откријат за какви цели служеле или од каде потекнуваат. Но, откриле дека 26 отсто од нивниот товар е опрема за риболов.
Истражувачите успеале да ја идентификуваат земјата на потекло за 232 објекти, а најголем процент е од Јапонија со 33,6 отсто. Следна е Кина со 32,3 отсто, а потоа Јужна Кореја со 9,9 отсто. Следни на листата се САД со 6,5 отсто, Тајван со 5,6 отсто и Канада со 4,7 отсто.
Заедно, овие шест земји сочинуваат над 92 отсто од ѓубрето пронајдено во Големиот пацифички тепих од ѓубре. Исто така, истражувачите пресметале дека ѓубрето во Големиот пацифички тепих од ѓубре има 10 пати поголема веројатност да дојде од риболовни активности отколку активности на копно.
Тие заклучуваат дека првите шест земји идентификувани во нивната работа редовно се вклучуваат во масовни риболовни операции.
Извор:
Phys.org
Фото: The Ocean Cleanup