Европските патници сè повеќе посакуваат патувања кои се комбинација од авантура и запознавање со локалната култура, вклучувајќи активности во природа, спорт, историја и гастрономија.
Традиционалните одмори на плажа набрзо би можеле да им отстапат место на активните патувања и таканаречените „предизвикувачки одмори“ („darecation“ – авантуристички одмор) бидејќи патниците сè почесто бараат адреналин и авантури на отворено наместо лежење со пијалак и книга.
Подем на авантуристичкиот туризам
Патувањата засновани на предизвици, како и потрагата по авантури, бележат сè поголем интерес во последните години. Платформата „Пинтерест“ ги издвои предизвикувачките одмори како еден од најголемите туристички трендови за 2026 година, при што пребарувањето за авантуристички туризам пораснало за дури 75 отсто.
Овој тренд во голема мера е последица на желбата по пандемијата за патувања и искуства кои оставаат траен впечаток и овозможуваат подлабоко запознавање на културата. Поради тоа, сè повеќе патници одлучуваат да штедат и да вложуваат во необични патувања наместо во повеќе вообичаени и слични одмори.
Според процените на Здружението за трговија со авантуристички патувања (ATTA), европскиот пазар за авантуристички туризам вреди приближно 404 милијарди евра. Германија, Франција, Италија, Шпанија, Холандија и Велика Британија ги претставуваат најголемите пазари, при што 73 отсто од патниците наведуваат дека се „отворени за авантура“.
Кои активности се најпопуларни?
Планинарењето и алпинизмот беа меѓу најбараните авантуристички активности во 2026 година, бележејќи раст од 69 отсто во споредба со претходната година. Популарни се и маратонските одмори, односно одморите посветени на маратони, како и членувањето во тркачки клубови кои нудат пакети за маратонски патувања.
Активности на вода и пешачење
Еден од популарните авантуристички видови одмори беше и едрењето, кое забележа раст од 54 отсто во споредба со претходната година. Меѓу водечките активности на вода се најде и рафтингот, кој бележеше годишен пораст од 38 отсто, а реката Сјоа во Норвешка беше едно од најатрактивните места.
Слично на тоа, одморите во кои патниците сакаат да пешачат пораснаа за 44 отсто годишно. Во Европа се многу популарни поради широката мрежа на добро обележани патеки кои минуваат низ различни предели: Алпите, шумите, историските градови, крајбрежните патеки и шармантните села. Меѓу другите популарни авантуристички патувања се најдоа сафари, археолошки истражувања, крикет и дуатлони.
Иако одморите полни со адреналин се во голем подем, експертите истакнуваат дека авантурата не значи исто насекаде во Европа. Некои патници сакаат подлабоко културно искуство, некои активна истражувачка авантура, додека трети бараат урамнотежена комбинација од двата пристапа.
- Европските патници се многу искусни и сè повеќе мотивирани од значајни патувања. Сакаат да се поврзат со локалната култура, да поминуваат време во природа и да имаат чувство дека нивните одлуки за патување придонесуваат за местата што ги посетуваат - вели Расел Волтерс, регионален директор на ATTA за Европа.
Извор:
Euronews.rs
Фото: Freepik