Минатата година во САД биле објавени 632 книги поезија и фикција што никогаш порано не биле преведени. Тоа беше петтата година по ред како во САД биле објавени повеќе од 600 преводи. Колку за споредба, секоја година од 2008 до 2010 година биле објавувани помалку од 400 преведени книги.

На што се должи зголемувањето на бројот на преведени книги? Чад Пост, одржувач на „Транслејшн датабејс“, верува дека причина за тоа се два фактора. Прво, големиот број нови издавачки куќи фокусирани на преводи, кои се отвориле во текот на последните неколку децении, а втората е огромната популарност на неколку неодамнешни преводи.


И покрај тоа што има зголемување на бројот на преводи, тие книги доаѓаат само од неколку земји. Од речиси 5.800 книги поезија и фикција што биле преведени од 2008 до 2018 година, повеќе од половина биле од само 9 земји, од кои 7 се во Европа. Другите две земји се Јапонија и Кина. Повеќе од 10 отсто од книгите оригинално биле објавени во Франција. Во текот на тој период само по една книга била преведена од Бенин, Етиопија, Киргистан, Мадагаскар, Мали и Мјанмар.


Како резултат на ова, само тројца најпреведувани автори од изминатата деценија не се од Европа.

Пост истакнува дека често има зголемување на бројот на преведени книги од некоја земја бидејќи владите на тие земји нудат грантови за преведување литература од нивните земји. Таков е случајот со Јужна Кореја, каде што владата плаќа за преводи, делумно во обид да добијат Нобелова награда за литература.