Завршувањето на факултетот некогаш го означуваше почетокот на самостојниот живот: првата сериозна работа, првиот стан и финансиската независност. За дел од новата генерација дипломци во САД, тој редослед веќе не е толку едноставен.

Високите трошоци за живот, забавеното вработување и сè поголемата неизвесност околу тоа како вештачката интелигенција ќе ги промени почетничките работни места ги тера младите Американци да ги менуваат плановите веднаш по дипломирањето. Наместо да се преселат во нов град и да изнајмат стан, многумина се враќаат кај родителите, ги одложуваат поголемите трошоци и се обидуваат да создадат финансиска резерва додека бараат работа.

Враќањето кај родителите како финансиска стратегија

Живеењето кај родителите за многумина повеќе не е само привремен чекор меѓу факултетот и првата работа, туку начин да се намалат најголемите месечни трошоци.

Истражувањето покажува дека половина од родителите со деца на возраст од 18 до 35 години рекле дека нивното дете во одреден момент се вратило дома. Речиси половина од младите кои се вратиле како причина ги навеле превисоките трошоци за домување, додека повеќе од една третина враќањето го поврзале со губење на работата или намалување на приходите.

За дел од младите Американци, враќањето кај родителите по дипломирањето затоа станува практична финансиска одлука. Живеењето дома им овозможува да ги намалат трошоците за храна, интернет, домување и други секојдневни потреби додека ја бараат првата стабилна работа.

Финансиските експерти истакнуваат дека овој период може да биде многу повеќе од обично чекање. Парите што инаку би ги потрошиле на кирија, автомобил или сметки, младите можат да ги насочат кон штедење и инвестирање и така да создадат основа за постабилен почеток на кариерата.

Автомобилот станува луксуз што може да почека

Покрај домувањето, младите Американци сè почесто се двоумат дали да купат автомобил.

Наместо да купат автомобил веднаш по факултетот, дел од новите дипломци избираат јавен превоз или други поевтини опции за да ги намалат месечните трошоци. За младите кои штотуку почнуваат да заработуваат, трошоците за купување автомобил, осигурување, гориво и одржување можат да претставуваат значителен дел од буџетот.

Ваквите одлуки покажуваат колку се промениле пресметките поврзани со влегувањето во возрасниот живот. Трошокот кој некогаш изгледал како речиси неизбежен дел од самостојноста, сега сè почесто се смета за нешто што може да се одложи.

Причината не е само желбата за штедење. Новите дипломци влегуваат на пазарот на трудот во време кога трошоците за живот се високи, а наоѓањето прва работа е потешко отколку за многу други групи работници. Покрај тоа, голем број американски дипломци истовремено треба да почнат и со исплата на студентските кредити.

Најголемиот проблем за многумина не е прашањето колку ќе заработуваат на првата работа, туку кога воопшто ќе успеат да ја најдат.

Новите дипломци често испраќаат десетици, па дури и стотици пријави пред да добијат можност за разговор со работодавач. Големиот број пријави не значи и голем број конкретни можности за вработување.

Дополнителна фрустрација создаваат таканаречените „лажни огласи за работа“, односно огласи кои остануваат активни иако компанијата всушност не вработува или работното место веќе е пополнето.

За младите кои штотуку се обидуваат да го направат првиот чекор во кариерата, таквиот пазар значи повеќе време поминато во испраќање пријави, поголема конкуренција и подолг период без стабилни приходи.

Вештачката интелигенција е уште една причина за финансиска претпазливост

Покрај инфлацијата и забавеното вработување, новата генерација има уште една грижа со која нивните родители не се соочувале кога влегувале на пазарот на трудот, вештачката интелигенција.

Експертите оценуваат дека развојот на алатките со вештачка интелигенција и ширењето на работата од далечина дополнително влијаеле врз дел од почетничките работни места. Токму таквите позиции традиционално биле влезна точка за дипломците без долгогодишно искуство.

Особена неизвесност постои во креативните и технолошките индустрии, каде што од кандидатите сè почесто се очекува да користат генеративна вештачка интелигенција или да работат на работни места поврзани со нејзиниот развој и обучување.

Новата слика на животот по факултетот

Враќањето кај родителите затоа не мора да значи дека младите се откажале од самостојноста. За дел од генерацијата З во САД, тоа станува прагматичен одговор на економијата во која првата работа, станот и финансиската сигурност се потешко достапни отколку што очекувале.

Наместо моделот „диплома, работа, стан“, почетокот на кариерата сè почесто изгледа вака: диплома, десетици или стотици пријави, привремено враќање дома, штедење и чекање на постабилна можност.

И можеби токму таа промена најдобро покажува колку се променила вредноста на факултетската диплома. Таа сè уште може да отвори врати, но на младите Американци повеќе не им гарантира дека веднаш ќе можат и да ги затворат зад себе - во сопствениот стан.

Извор: BIZlife.rs
Фото: Magnific