За новите студенти, изборот на главните предмети на факултет може да се чини како одлука што ќе им го одреди текот на животот. Но дипломата од полето на информатичка технологија не може да ви гарантира дека ќе создадете нова мултимилионска компанија, а дипломата од филозофија не значи дека ќе ве спречи да започнете бизнис.

Најдобрите и најинтелигентните директори имаат различно образование. Некои од нив избираат област на студирање директно поврзана со успехот и достигнувањата што ги реализирале, додека одлуката на другите немала смисла за нивната околина.

Без разлика дали сте дипломирале на меѓународни студии, како Витни Волф, основач на апликацијата „Бамбл“, или сте завршиле металуршко инженерство, како извршниот директор на „Гугл“, Сундар Пичаи, постојат многу начини да успеете во светот на технологијата.

Рид Хејстингс, директор на компанијата „Нетфликс“

Рид студирал математика на колеџот „Боудуин“, а подоцна и вештачка интелигенција на Универзитетот „Стенфорд“. За главни предмети ги избрал математика и информатика. Тој се откажал од колеџот на една година за да продолжи со летната задача: продажба на правосмукалки од врата на врата. На колеџ основал клуб што организирал планинарење и возење со кану.

Џек Ма, основач на компанијата „Алибаба“

Првиот обид на Џек Ма да се запише на факултет бил неуспешен. И вториот. И третиот. Џек се запишувал четирипати пред неговата апликација да биде прифатена. дипломирал англиски јазик. Денес неговото богатство се проценува на речиси 30 милиони долари.

Сузан Војчицки, директорка на компанијата „Јутјуб“

Судирала историја и книжевност на „Харвард“. Но завршила и економија на Универзитетот во Калифорнија. Сузан доаѓа од семејство на академци, па и од неа се очекувало да биде академски граѓанин. Нејзиниот првичен план бил да докторира на полето на економијата, но ги променила плановите кога сфатила дека нејзината прва страст е технологијата.

Џејмс Парк, директор на компанијата „Фитбит“

Џејмс Парк не дипломирал на „Харвард“ од проста причина - се откажал. Информатиката била негов главен предмет за време на студирањето.


Раид Хофман, директор на компанијата „Линкдин“

Раид дипломирал на Универзитетот „Стенфорд“. Една од неговите главни теми била когнитивната наука, а магистрирал на полето на филозофијата.

Травис Каланик, директор на компанијата „Убер“

Каланик студирал софтверско инженерство на Универзитетот „Калифорнија“ во Лос Анџелес, но се откажал за да му се посвети на проектот „Скоур“.

Мег Витман, директорка на компанијата „Хјулит пакард ентерпрајс“

Витман првично сакала да биде докторка, па почнала да студира математика и природни науки. Но откако во текот на летото продавала реклами за магазини, ги насочила своите интереси во областа на економијата.

Сатја Надела, директор на компанијата „Мајкрософт“

Иако првично сакал професионално да игра крикет, сфатил дека би било подобро да се занимава со науката и технологијата, што е неговата прва страст. Има диплома по електротехничко инженерство.

Илон Маск, директор на „Тесла“ и на „Спејс Екс“

Главните предмети што го окупирале вниманието на Илон биле физиката и економијата. Пред визијата за луѓето да живеат на Марс, Илон водел различен живот. Како студент на Универзитетот во Пенсилванија изнајмил куќа со 12 спални соби и ја претворил во ноќен клуб. Понекогаш имало 500 гости во една вечер.

Иван Шпигел, директор на компанијата „Снепчет“

Шпигел се откажал од студиите на Универзитетот „Стенфорд“. Иако одржал говор за време на доделувањето на дипломата, тој технички нема дипломирано. Бил многу блиску до добивањето на дипломата, но во последен момент се одлучил да се фокусира на „Снепчет“, што се исплатило.

Се чини дека студирањето и дипломирањето не се пресудни кога станува збор за успехот. Потребно е да имате визија, трпение, оригинални идеи и многу знаење кое можете да го стекнете и преку неформално образование.