Синдикатот на Македонска пошта бара итна средба со Министерството за транспорт и врски и Владата за состојбите во претпријатието кое, како што велат, се соочува со загуби во работењето и ризици за редовна исплата на платата.

Доколку во рок од пет дена не се одржи средба, синдикалното раководство најави дека ќе ги преземе сите законски мерки и механизми за заштита на правата на работниците со организирање протести и штрајкови. Повторно апелира генералниот директор на Пошта да го стопира огласот за 31 ново вработување во администрацијата на претпријатието, што сметаат дека е економски неиздржано во постојните финансиски услови.

- Стравуваме како вработени за натамошната иднина на друштвото, како и редовната исплата на платата за наредниот период со оглед на фактот дека платата за јануари ја зедовме на 17-ти месецов, по истекот на законскиот рок. И покрај тоа што Македонска пошта се соочува со сериозни проблеми со целокупното работење, генералниот директор распиша оглас за нови 31 вработување во администрацијата. Тие вработувања во оваа ситуација се непотребни со оглед на фактот дека во тој дел имаме превработеност, а тоа може да се направи со прераспоредување на работни места со цел поголема продуктивност и подобри услуги кон граѓаните - рече на прес-конференција Боро Велигденов, претседател на Синдикатот, посочувајќи дека нови вработувања се потребни во технолошкиот процес, односно на поштари, шалтерски и работници во оператива, каде што немаат доволно кадар.

Според него, не е преземено ништо за спроведување на трипартитниот меморандум за соработка потпишан на протестот во октомври лани што го организира Синдикатот. Тогаш со раководството и Владата беа договорени активности за внатрешни реформи, со нова систематизација и реорганизација на работењето, особено во делот на обезбедување услови и средства за работа, како и потпишување колективен договор.

Во Пошта, информира Велигденов, моментално работат над 2.000 вработени, а вкупната бројка во последните пет години се намалува, претходно изнесуваше 2.200. Проблемот е старосната структура, 65 проценти се над 55 години и заминуваат во пензија. Над 90 проценти од нив се во технолошкиот процес каде што имаме сериозни проблеми во работењето.

- Наместо да се сконцентрираме да ги подобриме услугите, односно да обезбедиме поквалитетна работа, преземаме непотребни чекори со новите вработувања. Платата за јануари е со задоцнување, со заеми, генерираме намалени приходи, работиме со загуба и стравуваме како ќе обезбедиме средства за редовна плата за наредниот период - рече Велигденов, посочувајќи дека според негови информации, платата за јануари била исплатена со помош на заем земен од Халк банка.

Со договорот по протестот во октомври лани, што следуваше по неисплатената плата за септември, е предвидено платите да се исплаќаат во законски предвидениот рок, до 15-ти во месецот. Исто така, со одлука на Владата државните институции добија задолжение да ги користат услугите на АД „Пошти“, како и дека ќе почне процес на реорганизација, рационализација и оптимизација на работењето на претпријатието, што ќе трае до 31 декември 2022 година и ќе се следи од Владата.

Националната Пошта има ексклузивно право да обезбедува резервирани поштенски услуги до 31 декември годинава, откако со законски измени повторно ѝ беше вратена монополската позиција во тој сегмент од пазарот.