Во оваа рубрика ви пренесуваме интересни податоци за нашата земја

Се наоѓа на јужниот дел од земјава, на околу 40 километри од Кавадарци. Зафаќа делови од планините Козјак и Кожув. Многумина мислат дека Алшар е неговото прастаро име, сепак, оригиналното име му е Мајден, по истоименото село до рудникот.

Таму е пронајден минералот лорандит - талиум арсен сулфид, кој иако е редок, е најчестиот минерал на талиумот. Лорандитот се користи за детекција на сончево неутрино преку одредена нуклеарна реакција во која е вклучен и талиумот. Има кристална структура и може да се синтетизира и во лабораториски услови.


Научниците велат дека рудникот бил познат уште од дамнешни времиња. Но, поголема експлоатација се случила кон крајот на 19 век. Старото име на рудникот било Мајден, но бидејќи концесионер било семејството Алатини (Евреи со италијанско потекло), а главниот инженер бил Шартно, направена е кованицата Ал-шар по која и денес е познат рудникот.

Трудови за Алшар пишувале многу наши и странски научници, рудникот бил инспирација за многу писатели. Преклани беше промовирано капиталното научно дело, монографијата „Алшар – светско природно наследство“ од шестмина реномирани автори – академиците Глигор Јовановски и Блажо Боев и професорите Трајче Стафилов, Петре Макрески, Владо Матевски и Иван Боев.

Талиумот во рудникот се наоѓа пред сѐ во минералот лорандит, кој има црвена боја и релативно мала цврстина, слично на гипсот. Бидејќи е кршлив, кристалите може да се издвојат во помали. Освен во Македонија, лорандитот го има и во наоѓалишта на злато или жива во Таџикистан, Русија, Кина, Иран, Швајцарија и во САД. Сепак, Алшар е најбогатиот извор на лорандит.
Научниците објаснуваат дека лорандитот дошол во фокусот на физичарите пред околу 30 години како можен геохемиски детектор на неутрина. Соларните неутрина потекнуваат од реакциите на фузија што се одвиваат во јадрото на Сонцето.