Редовното вежбање е добро за секого, но жените може да имаат поголеми кардиоваскуларни придобивки од мажите - и тоа за помалку време, според новата студија објавена во Журналот од Американскиот колеџ за кардиологија.

Заклучоци од студијата за здравствените придобивки од редовното вежбање за жени и мажи

Истражувачите набљудувале група од 400.000 мажи и жени во САД во текот на две децении. Тие објавиле дека жените што редовно вежбале имале 24 проценти помали шанси да умрат од која било причина во периодот на студијата и имале 36 отсто помал ризик од фатален срцев удар, мозочен удар или други кардиоваскуларни настани во споредба со жените што не вежбале редовно.

Истовремено, мажите што редовно вежбале имале 15 отсто помали шанси да умрат и 14 отсто помал ризик од фатален кардиоваскуларен настан во споредба со мажите што претежно се во седечка положба.

- Срцевите заболувања се водечка причина за смрт кај жените во САД и може да ги погодат жените на која било возраст. Болеста на срцето е одговорна за приближно еден од секои пет смртни случаи кај жените. Сепак, истражувањето покажало дека околу половина (56 проценти) од жените во САД сфаќаат дека срцевите болести се нивниот убиец број еден - вели д-р Раџ Дасгупта, клинички вонреден професор на Универзитетот „Јужна Калифорнија“, кој не бил вклучен во студијата.

Студијата покажува дека жените што редовно вежбаат имаат помали шанси за прерана смрт и фатални кардиоваскуларни настани во споредба со мажите кои имаат слични навики за вежбање, што ја нагласува важноста на редовното вежбање за долговечноста на жените и го нагласува потенцијалот за промена на однапред одредени здравствени резултати, додава д-р Дасгупта.

Која е вистинската мера?

Колку вежбање треба да биде доволно?

Научниците сметаат дека за мажите, вистинската мера е околу 300 минути умерена физичка активност или 110 минути енергична физичка активност неделно.

Односот количина-реакција на активност и користа, исто така, се разликувал кај мажите и жените. За жените, барем малку вежбање се чини дека има многу повеќе придобивки.

Истражувачите објавиле дека жените што правеле 140 минути умерени аеробни вежби неделно имале 18 отсто намален ризик од смрт, додека само 57 минути енергични аеробни вежби неделно довеле до 19 отсто намален ризик од смрт. Мажите, пак, мора да вежбаат двојно повеќе за да ги добијат истите придобивки, достигнувајќи 18 проценти со 300 минути умерени аеробни вежби неделно и 19 проценти со 110 минути енергично вежбање неделно.

- Се надеваме дека оваа студија ќе им помогне на сите, особено на жените, да разберат дека можат да имаат огромни придобивки од вежбањето. Се надеваме дека овие наоди ќе поттикнат повеќе жени да се движат повеќе и да го вградат вежбањето во својот живот - истакна коавторката на студијата, д-р Сузан Ченг.

Тренингот за сила е важен

Придобивките од редовното вежбање не се ограничени само на аеробик. Се чини дека тренинзите за сила исто така имаат значителни придобивки и жените повторно биле во водство.

На пример, жените што редовно вежбале за зајакнување имале 19 отсто намален ризик од смрт, додека мажите имале 11 отсто намален ризик, во споредба со нивните неактивни врсници. Забележан е и за 30 отсто помал ризик од кардиоваскуларни настани кај жените и 11 отсто помал ризик од кардиоваскуларни настани кај мажите.

Разликата во резултатите се сведува на разликата меѓу машкото и женското тело.

- Жените покажуваат поголема васкуларна спроводливост и проток на крв за време на вежбањето и имаат поголема густина на капиларите по единица скелетни мускули, во споредба со мажите - вели   д-р Трејси Заслоу, специјалист за спортска медицина од Институтот „Кедарс-Синаи Керлан-Џоб“ во Лос Анџелес.

Извор: Eklinika.telegraf.rs

Фото: Freepik