Образованието е основно човеково право, но многу деца во светот немаат пристап до него. За среќа на младите од Замбија, работите се променија пред неколку години.
Во 2021 година владата го направи школувањето бесплатно за секого. Оттогаш илјадници млади ученици со задоволство ја искористија шансата да добијат образование, собирајќи се во училниците низ земјата.
По имплементацијата, дополнителни 2 милиони деца се приклучија на образовниот систем, и многу повеќе се пријавуваат секој ден. Бесплатното образование ги опфаќа основното и средното образование, опфаќајќи период од седум години за основно образование, две години за јуниор-средно и три години средно образование.
Според УНИЦЕФ, сега на училиште одат повеќе деца од кога било, а стапките на завршување се зголемени на сите нивоа во Супсахарска Африка. Сепак, 9 од 10 деца не знаат да читаат и до 10-годишна возраст разбираат само едноставна приказна.
И покрај многуте предизвици, оваа иницијатива ги подобри изгледите за многумина кои инаку не би можеле да си дозволат образование.
- Престанав да одам на училиште во 2016 година кога бев четврто одделение. Без бесплатно образование, не знам дали моите родители би можеле да си дозволат да ме вратат на училиште. Тие не работат - вели 18-годишната Маријана Чирва.
Од промената, училниците наменети за 30 ученици сега имаат над 100 ученици. Многу ученици се појавуваат многу порано за да си фатат клупа, а повеќето треба да ги делат книгите со шест или седум други ученици.
- Кога почнав да работам во училиштето во 2019 година, имаше околу 40 ученици, а сега се околу 100 и тоа само во едно одделение - вели наставничката Клеопатра Зулу, која додава дека разговорите еден на еден, па дури и оценувањето се вистински предизвик.
За да се бори против ова, владата започна масовно производство на клупи. Исто така, постои загриженост дека владините трошоци ќе се удвојат доколку сите ученици што ги исполнуваат условите ја искористат понудата за бесплатно образование. И покрај ова, официјалните лица веруваат дека образованието е најдобрата економска политика.
- Попрво би ги оставил децата во преполна училница отколку на улица - вели министерот за образование Даглас Сјакалима.
Извор:
Mymodernmet.com
Фото: Facebook/UNESCO Media Team