Кое пакување на сок од портокал би го избрале како најодржлива опција?

Алуминиум, изработен со рециклиран материјал;
Биоразградлив картон;
Стакло кое може 100 отсто да се рециклира;
Биоразградлива пластика.

Ако сте како американските потрошувачи анкетирани од научниците за храна во истражување спроведено од Универзитетот во Масачусетс, би претпочитале стакло и верувате дека тоа е најодржливиот избор. Но, ќе згрешите.

- Стаклото беше најбараниот и најценетиот вид на пакување. Но, излегува дека стаклото е меѓу најмалку одржливите ако се погледне целиот животен циклус на пакувањето - вели Номзамо Дламини, главна авторка на трудот.

На прашањето да ги рангираат изборите за пакување од најмногу до најмалку одржливи, генерално, потрошувачите одговорија: стакло, картон, алуминиум и пластика.

Иако одржливоста на пакувањето на храната варира во зависност од видот на производот и пакувањето, големината и тежината на контејнерот и други варијабли, во случај на сок од портокал, картонот би бил најодржлив, проследен со пластика, потоа лименка и, конечно, стакло.

Ова било изненадување дури и за Дламини.

- Бев шокирана кога ја прочитав процената на животниот циклус од експертите дека е потребно толку многу енергија за да се произведе стакло и да се рециклира - многу повеќе од она што е потребно за да се направи или рециклира пластика - вели таа.

- Влијанието на производството и крајот на животниот век на пластиката е помало од она на стаклото, пластиката е полесна и затоа бара помалку енергија за транспорт, дополнително, процесот на асептично запечатување на пластичните контејнери со помош на пареа бара помалку енергија отколку системот што се користи за стакло - пишува во трудот.

Трудот имаше цел да ја разбере мотивацијата за изборот на амбалажата на потрошувачите, а исто така да ги измери цената, начинот на живот и другите ставови. За возврат, податоците може да им помогнат на експертите од индустријата да разберат што мислат, веруваат и претпочитаат потрошувачите и да ги едуцираат за тоа како да направат поодржливи избори. Иако многу потрошувачи изразиле намера да купат одржливо пакување, на крајот главниот мотивационен фактор е цената, особено најниската цена - проследена со типот на пакување и барањето за пакување.

Пораката до прехранбената индустрија е дека потрошувачите се мотивирани да изберат одржливо пакување, сѐ додека цената е соодветна.

Извор: Phys.org
Фото: Unsplash