Плитвичките Езера во Хрватска стануваат еден од најскапите национални паркови во светот - во текот на летото влезниците ќе изнесуваат над 40 евра.
Причината за зголемувањето е фактот што станува збор за локација на светско наследство која е загрозена поради метежот, така што треба да се ограничи бројот на посетители.
Цената од 40 евра (300 куни) се однесува на посетите во јуни, јули, август и во септември. Цената за деца и млади до 18 години во тој период ќе биде околу 15 евра (120 куни).
Тоа значи дека влезниците за четиричлено семејство ќе чинат 111 евра, а на таа сума треба да се додадат и трошоците за храна, пијалак и паркинг, па цената на еднодневниот излет ќе изнесува 140 евра.
Бројот е ограничен на 12.000 посетители на ден, додека претходно имало 15.000 и 16.000 посетители во текот на летните месеци.
Плитвичките Езера минатата година направиле приход од речиси 52 милиона евра, а подготвени се проекти вредни 19 милиони евра за модернизација на хотелите. Исто така, се спроведуваат и 60 стручни проекти од институтите и факултетите за флора и фауна.
Речиси сите најпознати светски
национални паркови имаат поевтини влезници. Цените се движат од 2 до 35 евра, некои имаат поевтини влезници за локалното население, а посетата на некои национални паркови е бесплатна.
За посета на Големиот Кањон во САД треба да се издвојат 35 долари (30 евра) ако во него се влезе со возило или 20 долари (17 евра) ако се влезе пешки или со велосипед. Влезница во американскиот Јелоустоун е 30 долари (26 евра) со возило или 15 долари (13 евра) пешки или со велосипед и тоа до седум дена престој. Посетата на Нијагарските Водопади во Канада е бесплатна.
Портпаролот на националниот парк, Огњен Борчиќ, изјави дека минатата година имало 1,8 милион посетители, што е прилично висок број, но со системот на онлајн-порачување влезници максималниот број на влезници е намален од 15.000 на ден во текот на летните месеци во изминатите години на 8.000 до 10.000 минатото лето.