Откако Австралија одлучи да ги забрани социјалните мрежи за децата, и Шведска размислува за сличен потег, но од различни причини.

Австралија усвои закон со кој им забранува на децата под 16 години да користат социјални мрежи како „Фејсбук“, „Тик-ток“ и „Инстаграм“ за да го заштитат своето ментално здравје. Сега и Шведска сака да ја воведе истата забрана, но поради криминалот на бандите.

Законот во Австралија ќе стапи во сила следната година и пропишува казни до 32 милиони долари за компаниите што нема да го забранат пристапот на социјалните мрежи за деца под 16 години. Оние што го поддржуваат законот веруваат дека забраната е неопходен одговор на растечката загриженост за менталното здравје на младите поврзана со користење на социјалните мрежи.

Од друга страна, шведската влада размислува за воведување старосни ограничувања за социјалните мрежи доколку компаниите не успеат да ги спречат бандите да регрутираат деца преку интернет за да извршуваат насилни злосторства, вклучувајќи убиства и бомбашки напади.

Дискусијата доаѓа во време на пораст на насилството поврзано со бандите, што ја направи Шведска земја со највисока стапка на фатални престрелки по глава на жител. Ова е во целосна спротивност со позицијата на Шведска пред две децении, кога оваа стапка беше меѓу најниските.

Во изминатите две години шведската полиција соопшти дека бандите сè повеќе ги користат социјалните мрежи како „дигитални пазари“ за да регрутираат млади луѓе, некои на возраст од 11 години, за да вршат насилни злосторства во Шведска и во соседните нордиски земји.

Министерот за правда Гунар Стромер рече дека ситуацијата е многу сериозна по средбата со нордиските министри за правда и претставниците на компаниите за социјални мрежи, вклучувајќи ги „Тик-ток“, „Мета“, „Гугл“ и „Снепчет“. Тој нагласи дека платформите мора да дадат „конкретни резултати“ во решавањето на овој проблем и посочи дека Шведска е отворена за регулаторни мерки што ги спроведуваат другите земји.

Податоците на шведската полиција откриваат дека за седум месеци годинава, 93 деца помлади од 15 години биле осомничени дека биле вмешани во планирање убиства, што е трипати повеќе отколку во истиот период минатата година. Данските власти од април регистрирале 32 случаи во кои Швеѓани, често тинејџери, биле регрутирани да извршуваат насилни дејствија. Затоа данските политичари ги нарекоа „деца-војници“.

Шведскиот министер за образование Јохан Персон изрази загриженост за штетното влијание на социјалните мрежи врз децата. Тој рече дека децата во моментов ги отфрлаат своите животи и дека се заробени во кругот на активности поврзани со банди на интернет.

Извор: Klix.ba
Фото: Freepik