Европските компании заостануваат зад нивните американски колеги во иновациите и технологијата поради начинот на размислување, вели Николај Танген, извршен директор на „Норгес банк инвестмент менаџмент“.

Танген вели дека постои јаз во општото ниво на амбиции меѓу Европејците и Американците што доведе до тоа американските акции значително да ги надминат нивните конкуренти.

- Треба да бидам внимателен кога зборувам за рамнотежата помеѓу работата и животот, меѓутоа, може да се каже дека Американците едноставно повеќе работат - вели тој.

Норвешкиот фонд за богатство, најголемиот во светот, има повеќе од 11.000 инвестиции во 72 земји, од кои 71 отсто се во акции. Минатиот квартал фондот објави рекордна добивка од 213 милијарди долари, поттикната од акциите во растечките технолошки компании како „Мајкрософт“, „Епл“ и „Нвидија“.

Американските акции сочинуваат речиси половина од целото портфолио на акции на фондот, вели Танген. Тоа беше повеќе од 32 отсто во 2013 година. Наспроти тоа, Велика Британија сочинуваше 6 отсто од нејзините акции, што е помалку од 15 отсто пред една деценија.

Јазот во балансот помеѓу работата и животот меѓу САД и европските земји е прилично голем. На пример, Европската Унија има задолжителен четиринеделен платен одмор во сите 27 нејзини земји. Некои земји бараат и дополнителни платени слободни денови покрај задолжителниот одмор. Во меѓувреме, во САД речиси една третина од вработените велат дека немаат слободно платено време, а оние што имаат не го користат секогаш, покажува извештај од 2023 година. Истиот извештај покажува дека 765 милиони денови за одмор остануваат неискористени од Американците секоја година.

Во 2022 година Американците во просек работеле 1.811 часа годишно, додека во Велика Британија луѓето работеле 1.532, во Франција, 1.511 часа, а во Германија 1.341 час.

Друга голема разлика меѓу двете работни култури е прифаќањето на деловните ризици, особено кога работите тргнуваат наопаку, вели Танген.

- Ако пропаднете во Америка, ќе добиете уште една шанса. Ако пропаднете во Европа, вие сте мртви - додава тој.

Извор: Qz.com
Фото: Screenshot/YouTube