Колку денови има месецов, ќе дојде ли конечно тој 1-ви?, Што ако ја задоцнам ратата за кредит од 5 до 50 дена, А да застанеше вагава на иста бројка, конечно! Ај од утре на диета, Пак ќе заглавам на работа, да се јавам комшивката да го причува детето, Договорот ми е на определено!, Нема мој термин, ќе молам за приоритетен...

Колкав е купот на загрижувачки мисли што ни минуваат низ глава во текот на само еден ден? Има ли врв и дно? Па кога ќе се помешаат и јадосувачките... И каква е таа ментална хигиена во македонски услови?
Ова, се чини, се сосема логични мисли и прашања на луѓе што со децении живеат во транзиција, која кај и да е може и ќе заврши, од избори до избори, економија која ете „сега ќе процвета“, а образование и здравство што „ќе станат достојни за граѓаните“...
Па ако за чувствата се „задолжени“ психолозите, ги прашавме токму нив.


Прочитајте што предлага.

Среќа 1 – калапче од убавини завиткано во хартија која брзо се троши!
Среќа 2 – кула од карти многу грижливо редени со потенцијал брзо да се претворат во минато!
Среќа 3 – додека си ја помислил... некој друг ти ја лапнал!
Среќа 4 – многу зезната апстрактна именка со уште поапстрактен приод особено за луѓе што навикнале да одат праволиниски, притоа газејќи го она малку од истата (среќата) на патот наречен – потрага по среќата!

Знам, знам, ви се прислоши кога прочитавте колку посакуваните нешта се всушност невидливи за „ќоравото“ око на „севидливиот“ материјалист. И знаете што?! Баш ми е гајле дали се сложувате со мене или не, сè додека помислата колку се мачите додека го размислувате нештото кое се чувствува ме прави среќен. Е па ако сте само уште еден од сите трагачи по среќа, седнете удобно на фотелјата која, ако не ве усреќува, барем ве прави задоволни и читајте:

1. Усреќувачки мисли:

- Помисли на розов слон во када полна со сапуница кој гледа серија во која мравките зборуваат за значењето на тежината и ќе се насмееш...

- Секогаш кога некој ти е непријатен или не го сакаш, замисли го во шарени гаќи на фреквентна раскрсница и ќе се урамнотежиш...

- Кога те боли левата нога, помисли на некој што ја нема и десната и сети се дека ти ги имаш двете, само што едната те боли... и ќе ти олесни...

- Помисли дека лани во исто време не беше посреќен, ама ниту помалку среќен и дека како ти беше, зависеше само од тоа што и како мислиш... и ќе ти дојде поубава замисла...

2. Усреќувачки препораки:

- Препорачај си сам на себе дека утре нема ништо да си препорачуваш и ќе сфатиш дека си среќен што не мораш ама баш ништо препорачливо да си препорачуваш, додека сите други што се несреќни те подучуваат, секогаш препорачливо да си препорачуваш најнепрепорачливи нешта... И ќе станеш непрепорачливо, ама ендемично опуштен...

- Кога ќе станеш на лева нога, наместо да ја масираш, помисли дека најверојатно само си спиел на неа минатата ноќ и насмевнувајќи се ќе сфатиш дека си разбрал оти среќата лежи во малите и глупавите нешта... и ќе станеш скромен...


3. Усреќувачки рецепти:

а) Појадок:

- Лесен шејк од тешки емоции кои добро ќе ги сомелеш за да ти се мавнат од трпезата на животот, прелиени со тон и пол посакувани глупости кои, поради минатите тешко-калорични појадоци, си ги имаш забранувано... И ќе станеш виток...
- Чаша јогурт обезмастен од презаситена туѓа негативна енергија што си ја кркал синоќа додека си се надевал дека ќе си легнеш расположен... И ќе се ослободиш...

б) Ручек:

- Силно запржен лански грав, потпечен до смрдеа, зачинет со феферонки од баба ти и сервиран без врска, за да им пратиш неколку гасовити поздрави на сите твои душегрижници додека ти спремаат вечера од зло и пакост... И ќе уживаш во „мило за драгото“
- Дебело црвено вино во голема чаша... И ќе се почувствуваш вистинито...

- Две свежи варени јајца снесени во дворот на соседот чии кокошки се среќни, бидејќи се глупави... и ќе оглупиш среќно...
- Попара од ракатка, разноразни јаткасти плодови од дрвото на среќата и земјата на задоволството наречена љубовна поезија во телесен облик... И ќе станеш сабајле наспан и екстатичен...

Клуч за среќо-тестот: Погледни ги сите болдирани зборови и ќе сфатиш дека среќата е: насмевка, леснотија, рамнотежа, убава замисла, опуштеност, скромност, убавина, витост, вредност, слобода, праведно возвраќање некому, вистинитост, наспаност, екстаза, а богами понекогаш и доза оправдана глупавост! Сето ова и сето она и сето тоа што го знаеме или не, ама е тука некаде... Ајде сега, одам јас и... среќно!