На страницата на Министерството за труд и социјална политика се објавени препораките за заштита на работниците при работа во услови на топлотен бран, во кои се наведува дека согласно Законот за безбедност и здравје при работа, работодавецот е должен да обезбеди соодветни услови за работа кои нема да ги загрозат животот и здравјето на работниците.

-Со проценка на ризик се утврдуваат работните места на кои работникот може да биде изложен на високи температури и/или топлинско зрачење, односно неповолни микроклиматски услови и се утврдуваат мерки кои работодавецот треба да ги преземе за намалување на ризикот на најмала можна мерка - стои во препораката.

Во неа се додава дека лекарот-специјалист по медицина на труд треба да ги има предвид работните места со ризик од изложеност на високи температури.

- Работни места на отворен простор: (градежни работници, земјоделци, градинари, работници во сообраќај, работници кои изведуваат теренска работа, продавачи на отворени пазари, пожарникари, полицајци, војници и др.)

Во продолжение следуваат препораките до работодавците:

-Проверка на техничко-технолошки колективни мерки за заштита (адекватна вентилација и по можност климатизација);
-Контролирање на микроклиматските параметри;
-Обезбедување на минимум една климатизирана просторија со функција на „засолниште” (каде вработените можат да се разладуваат извесен период во текот на работата);
-Промени во организацијата на работниот процес (работа во смени, ротација на работниците и сл.);
-Избегнување на работа на отворено за време на најтоплиот период на денот (11:00 до 17:00 часот) или нејзино редуцирање;
-Редуцирање на тешка физичка работа. Почести паузи во текот на работата. Разладување на вработените со обезбедување на климатизирани простори и доволно разладени течности за пиење;
-Смалување на интензитетот на работата и нормите во производството;
-Избегнување на прекувремената работа. Прекин на работата при потреба;
-Поттикнување на самопријавувањето на симптомите кај вработените;
-Обезбедување на адекватни лични заштитни средства;
-Внимателност со ранливите вработени (постари работници, хронични болни, лица со прекумерна телесна тежина, бремени жени и др.) и нивно прераспределување (оние што не се во добра физичка кондиција да бидат преместени на полесни работни места);
-Запознавање на работниците со ризикот на работното место од високи температури, можните штетни ефекти по здравјето, како и со мерките за работа на безбеден начин;
-Предупредување на вработените за зголемената опасност од несреќи при работа (пожари). Посебно внимание и надзор при работа со хемиски материи заради поголема опасност од интоксикација.
А ова се препораките за работниците:

Општи препораки

-Правилен режим на исхрана со доволно минерали, белковини, витамини. Повеќе овошје, зеленчук, без многу масти. Лесен оброк пред работа, дополнителен оброк во текот на работата, а најобилен и енергетски најсилен оброк по завршената работа;
-Пиење течности - 2 литри вода минимум дневно. При услови на големи горештини се препорачува земање 1 чаша вода на 20 минутни интервали. Да не се користат напитоци со алкохол и кофеин (заради опасност од дехидратација). При засилено потење и интензивна физичка активност да се пие минерална вода (со јаглерод диоксид и електролити), поради можен губиток не само на течности, туку и на електролити;
-Земање лекови само во консултација со својот доктор;
-Соодветен режим на одмор со кратки паузи во текот на работата;
-Доволно спиење дома;
-Намалување на интензитетот на физичките активности, туширање и разладување;
-На работа на отворено, во услови на изложеност на сончеви зраци да се користат креми за сончање со заштитен фактор (30 и повеќе).

Користење на лични заштитни средства

-Работната облека да е од лесна порозна ткаенина (од природни влакна, светла боја, памук, лен), а при работа на отворен простор да се користат очила, капи, шешири со доволно голем обод за заштита на главата.
-Отстранување на облека која го смалува потењето. Менување на облеката при значајно потење;

Прва помош на работното место

-Препозанавање на симптомите на топлотно исцрпување или топлотен удар (исцрпеност, слабост, замор, главоболки, несвестица, бледило, вртоглавица, повраќање, вознемиреност, конфузија, колапс, конвулзии, шок);
-Самопријавување на симптомите, грижа за колегите (будност за појава на симптоми);