Министерството за здравство информира дека согласно извештајот на Институтот за јавно здравје кој се однесува на периодот од 24 до 30 август 2020 година, направени се 9.944 тестирања за коронавирус, а регистрирани сe 666 нови позитивни случаи, што претставува намалување од 20,6% во споредба со претходната недела.

Новорегистрирани случаи има во 29 града во државата, а најголем дел се од Скопје (31,4%). Во истиот период, во 23 града, или 7 повеќе во однос на претходната недела, бројот на новодијагностицирани е под 20.  

Процентот на позитивни случаи од тестирани изнесува 6,7%, што претставува намалување од 0,8% во споредба со претходната недела.
- Овој индикатор и натаму покажува континуиран тренд на намалување во однос на претходните недели - велат од Министерството за здравство.

Регистрирани се заболени лица во сите возрасни групи. И во овој период најзастапена е возрасната група на лица над 60 години со 158 (23,7%) позитивни.


- Од случаите што се епидемиолошки истражени (98,6%), регистрирани се 71 хоспитализиран (намалување од 40,3% во споредба со минатата недела), а кај 195 лица е регистрирано присуство на коморбидитети. Од вкупниот број нови случаи, 212 имаат контакт со потврден случај. Регистрирани се 24 лица со историја на патување во последни 14 дена - велат од Министерството за здравство.

Во споменатиот период, по добиени 2 негативни теста за присуство на SARS-CoV-2 или со употреба на новиот алгоритам, како оздравени се водат 1.112 лица што биле хоспитализирани или на домашно лекување, што е за 558 повеќе во однос на претходната недела.

Пријавени се 35 смртни случаи од 13 града, зголемување од 84,2% во однос на минатата недела. Во однос на возраста, 26 биле над 60 години, 5 на возраст од 50 до 59 и 4 на возраст од 40 до 49 години. Сите починати биле хоспитализирани, а коморбидитети се регистрирани кај 29 од случаите.