Според неделниот извештај на Институтот за јавно здравје, во периодот од 1 до 7 февруари се тестирани вкупно 14.398 материјали во лабораториите во кои се спроведува молекуларно тестирање и антигенско тестирање за присуство на SARS-CoV-2, со зголемување од 4,8% во споредба со минатата недела. Регистрирани сe 2.120 нови позитивни случаи од 34 града во државата со зголемување од 4,1% во споредба со минатата недела, соопшти Министерството за здравство.

Најголем дел од регистрираните случаи се од Скопје (n=1.011; 47,7%), со неделна инциденца – 163,7/100.000. Највисока неделна инциденца од 415,7/100.000 е регистрирана во Демир Капија.
Процентот на позитивност се движи од 10,3 до 17,7%, просечно 14,2%, идентично како минатата недела.

Регистрирани се заболени лица во сите возрасни групи. Најзастапена е возрасната група на лица на возраст над 60 (n=568, 26,8%). Голем број заболени се регистрирани и кај лицата во возрасните групи 30-39 (n=422; 19,9%), 50-59 (n=381; 18,0%), 40-49 (n=358; 16,9%) и 20-29 (n=257; 12,1%). Најмал број е регистриран кај децата од 0 до 9 (n=40; 1,9%) и 10-19 години (n=94; 4,4%).

По добиени 2 негативни теста за присуство на SARS-CoV-2 или со употреба на новиот алгоритам, со статус „оздравени“ се стекнале 3.322 лица кои биле хоспитализирани или на домашно лекување, 11,6% повеќе во споредба со минатата недела.

Пријавени се 66 смртни случаи од 21 град, со зголемување од 3,1% во споредба со минатата недела. Во однос на возраста, 58 лица биле над 60 години, 5 лица на возраст од 50 до 59 години и по едно лице на возраст од 40-49, 30-39 и 20-29 години.

Во текот на минатата недела (01-07.02.2021) до ИЈЗ се пријавени 649 материјали кои биле секвенционирани за присуство на британскиот сој на SARS-CoV-2 од три лаборатории (ИЈЗ, Жан Митрев и МАНУ). Од секвенционираните, 56 се позитивни за присуство на новиот сој на SARS-CoV-2. Од овие резултати е забележано дека британскиот сој на SARS-CoV-2 е присутен во осум града, а најголем број случаи се откриени во Охрид (n=25), Прилеп (n=10) и во Кавадарци (n=4).

Согласно анализите од МАНУ, во последниот период се детектирани поголем број нови варијанти, кои претходно не беа присутни кај пациентите во нашата држава, што може да укажува на континуиран внес на нови случаи на Ковид-19 од странство.