Кога некој ќе ви каже дека пешачењето не е тренинг, не слушајте го. Секоја активност е добра, и тоа важи и за пешачењето кое може да ви помогне да постигнете цели поврзани со кондицијата и губењето калории.

На повеќето луѓе пешачењето им одговара повеќе отколку трчањето. Меѓу другото, бидејќи пешачењето може да трае подолго од трчањето. Спротивно на популарното мислење, пешачењето е доста ефикасен начин на согорување на маснотиите.

Едно истражување ги разгледувало ефектите од пешачењето кај жените со прекумерна тежина во период од 12 недели и открило дека е особено ефективно во намалување на маснотиите на стомакот, кои го зголемуваат ризикот од дијабетес и срцеви заболувања.

Затоа пешачењето им се препорачува на сите што патат од прекумерна тежина, но и на оние што немале претходно искуство со вежбање.

За сите што сакаат да станат физички активни, тренерот Еш Вилкинг направи предлог-рутина за пешачење што исто така ќе биде одлична за согорување калории.

Станува збор за рутина што трае 60 минути, а е составена од три дела.

1. Загревање (12 минути)

Една минута одете побрзо од вообичаеното темпо, а потоа 30 секунди трчајте в место, така што колената ќе ги подигнувате што е можно повисоко или со петиците удирајте го задникот. Повторувајте ги овие две вежби наизменично 8 пати.

2. Одење со различно темпо (40 минути)

Три минути одете со побрзо темпо, а потоа две минути побавно. Повторете го ова 8 пати.

3. „Ладење“ (8 минути)

Одете во бавно темпо 8 минути.

Ова е активност на која не ѝ пречат ниту ниските температури. Облечете се добро, уживајте во прошетката и сигурно ќе се чувствувате одлично еден час подоцна.

Извор: 6yka.com
Фото: Freepik