Посетивме неколку средни училишта во Скопје и се уверивме дека некаде родителите правеа поголем метеж отколку самите ученици

Средните училишта во Македонија ги отворија вратите за упис на средношколци во новата учебна година, а најголем интерес, како и во минатите години, има за гимназиите и за некои стручни училишта. Посетивме неколку средни училишта во Скопје и се уверивме дека некаде родителите правеа поголем метеж отколку самите ученици.

- Родителите сметаат дека доколку ги остават први документите за упис, тоа е гаранција дека нивното дете ќе биде примено - вели Илми Ковачи, професор од ДСМУГС „Д-р Панче Караѓозов“.

Холот во гимназијата „Јосип Броз-Тито“

Еден од родителите што со часови чекаа пред влезот на училиштето истакна дека неговата ќерка се запишуваа одејќи по стапките на својата тетка. Од друга страна, пак, има и такви на кои медицината им е љубов од мали нозе. Теона Ангеловска ни кажа дека токму поради тоа, ја одбрала насоката медицинска сестра техничар.

- Сместувањето во училишниот интернат е добар избор за оние што не се од Скопје. И локацијата е до самото училиште, но би требало условите за престој во интернатот да се подобрат – рече Ангеловска.

Во ова средно училиште за само неколку часа се исполнети предвидените места. Поголем дел од идните средношколци ни изјавија дека се запишале за медицински сестри, а голем беше интересот и за фармацевтски техничар.

Интерес за упис на насоките поврзани со компјутерска техника

Директорот на гимназијата „Раде Јовчевски-Корчагин“, Драган Арсовски, вели дека бројката на кандидати што доставиле документи до 12 часот е 285, а примаат само 262 ученика во осум паралелки.

- За разлика од лани, зголемен е интересот, но последните десет години бројката е иста. Независно од тоа колку ученици ќе се пријават, зголемување на квотата нема да има – додаде тој. Во средното електротехничко училиште „Михајло Пупин“ има интерес за упис на насоките поврзани со компјутерска техника. Денеска документи оставиле 150 ученици, што не било случај во 2017 година.

- Најголем афинитет се покажува кон компјутерска автоматика и енергетика. Ќе бидеме задоволни ако ја надминеме бројката од 200 ученици. Минатата година запишавме 193 ученици – вели Ефтим Пејовски, директор на СЕТУ „Михајло Пупин“.

Метеж пред средното медицинско училиште во Скопје

Зоран Николовски, директор на средното угостителско училиште „Лазар Танев“, објаснува дека интересот и оваа година не е мал, односно во првиот ден од уписниот рок се запишуваат најмногу ученици. Денеска до 12 часот се запишале повеќе од сто ученици. Сепак, и покрај тоа што гледано во проценти интересот се зголемува од година на година, бројката на запишаните ученици е мала.

- Бројот на запишани ученици во „Лазар Танев“ не е доволен доколку согледаме дека со самиот развој на угостителско-туристичката индустрија во земјава се зголемува и потребата од овој кадар. Запишани ученици има, меѓутоа, не толку колку што имаме места според квотите – вели Николовски.

Утре е вториот ден од јунскиот рок за упис во средните училишта во земјава, а слободни места има за 24.915 ученици. Резултатите ќе бидат објавени на 20 јуни.

Во јунскиот рок ќе има и второ пријавување и запишување на ученици на 28 јуни, а резултатите и слободните места ќе се објават наредниот ден. За учениците што се упатени на поправни испити, испит на година, испити за побрзо напредување, се организира втор уписен рок во август.

Теодора Цветковска и Бисера Трајковска