Како и остатокот од планетата, најмалата островска земја на светот во последните недели ја тресеше фудбалска треска. Но, штом Шпанија го подигна трофејот на Светското првенство, исчезнаа речиси сите траги од фудбалот на Науру. На овој пацифички остров фудбалот речиси не постои.

Науру никогаш не составил тим за официјален меѓународен натпревар и има само еден терен – од песок.

Иако постои одреден интерес за големите натпревари од британската Премиер лига, а децата носат дресови од Лионел Меси и Кристијано Роналдо, какви било обиди навистина да се заигра фудбал се исмеваат, освен ако не се работи за австралиски фудбал.

Но, тоа сега би можело да се промени бидејќи група волонтери, предводена од поранешниот играч Чарли Помрој, се обидува да ја воведе играта во некогаш најбогатата земја по глава на жител, која денес во голема мера зависи од странска помош и има една од највисоките стапки на дебелина во светот.


Поставувањето на темелите на остров каде што прекумерното рударење практично го претвори пределот во површината на Месечината е далеку од едноставно.

Најблиску што Науру стигнал до играње меѓународен натпревар било кога тимовите на репрезентацијата се соочиле со тим од иселеници од Соломонските Острови во 1994 година и тим од бегалци во 2014 година.

Неговото комплицирано минато може да објасни зошто најпопуларниот спорт во светот имал проблеми да фати корен тука.

Сместен во Пацифичкиот Океан, на 2.500 милји североисточно од Австралија, историското богатство на Науру било засновано на неговите бескрајни наслаги на фосфат од фосилизиран птичји измет.

Науру, кој бил територија зависна од Австралија сè до прогласувањето на независноста во 1968 година, кон крајот на 20 век бил во огромна мера изложен на рударска експлоатација.

Минералите на крајот пресушиле, оставајќи ја земјата која некогаш се викала Пријатни Острови во руинирана состојба, при што големи делови од нејзината централна област се невозможни за живеење и екстремно тешки за обработка на земјиштето.


А дури и таа површина се намалува бидејќи климатските промени и порастот на нивото на морето го загрозуваат опстанокот на самата земја.

Поради неплодното земјиште, земјата увезува повеќе од 90 проценти од храната, при што голем дел од таа храна е преработена, што придонесува за тоа 69 проценти од населението да се класифицира во категоријата дебели, додека околу 40 проценти страдаат од дијабетес тип 2.

Секојдневниот живот на островот е тежок, а спортот на многу луѓе им нуди растоварување; најпопуларен спорт е австралискиот фудбал, кој го играат 30 проценти од локалното население. Популарни се и атлетиката и кревањето тегови, спортови во кои Науру учествувал на Олимписките игри.

Науру во 2028 година ќе биде домаќин на Микронезиските игри – натпреварување во повеќе спортови кое го опфаќа и фудбалот и кое ќе ја покаже желбата на овој остров преку спортот да го унапреди меѓународниот углед.

- Тие се обидуваат да го подобрат имиџот и повеќе да се занимаваат со спорт - вели Помрој, технички директор на Фудбалската федерација на Науру и еден од осумте волонтери што работат на развојот на фудбалот на островот.


Топките ќе бидат доставени со авион, во тури од по 200 парчиња, за да се олесни дистрибуцијата и да се избегне евентуално губење.

Многу работи зависат од пронаоѓањето терен за игра

Голем дел од земјиштето е во приватна сопственост или е несоодветно за живеење, но волонтерот Тајрон Деие се надева дека ќе искористи дел од семејниот имот за да направи повеќе терени, покрај оној единствениот што моментално постои – прашлива фосфатна површина на набиена подлога.



Помрој нагласува дека Фудбалската федерација на Науру не се обидува да им наметне фудбал на сите, туку дека се работи за поставување темели за овој спорт, промовирање здрав начин на живот и изградба на заедница.