Поголемиот дел од човечкото тело е составено од вода - 60 проценти, поточно. Да бидете хидрирани е особено важно ако вежбате интензивно или во текот на потоплите месеци, кога е поголема веројатноста да се потите и да дехидрирате ако не ги надоместувате правилно течностите и хранливите материи.

Постојат голем број начини да останете хидрирани што можеби не сте ги разгледале, но има и многу дезинформации за хидратацијата.

Дали кафето дехидрира?

Веројатно сте слушнале дека кафето дехидрира. Сепак, тоа се покажало како погрешно.

- Кафето, чајот или другите производи со кофеин не ве дехидрираат целосно, особено ако ги пиете редовно. Вашето тело може да се приспособи на одредена количина кофеин, а тоа има помало влијание врз вашиот статус на хидратација - изјавила диететичарката Кетрин Зерацки од клиниката „Мајо“.

Кафето е диуретик, што значи дека го зголемува излачувањето на урина и ве тера да мокрите почесто. Сепак, кафето не треба да биде ваш главен извор на хидратација, затоа не заборавајте да го балансирате со вода и други опции за хидратација во текот на денот.

Храната не хидрира?

Ќе ви биде полесно кога ќе откриете дека можете да се хидрирате и преку храна. Вклучувањето храна како зеленчук, супи и овошје во вашата исхрана може да ви помогне да ги задоволите вашите потреби за хидратација.

- За просечниот човек, зголемувањето на внесот на овошје и зеленчук - без сол - може да биде корисно за подобрување на хидратацијата и целокупното здравје - вели Зерацки.

Нутриционистката Мариса Мур препорачува прво да се фокусирате на многу вода, а потоа да додадете хидрирачко овошје и зеленчук за да останете хидрирани.

Електролити - магнезиум, калциум и калиум

Зерацки препорачува исхрана богата со хранливи материи, полна со минерали и електролити. Вели дека некои од најдобрите намирници за овој тип исхрана се јаткасти плодови, семки, мешунки, разновиден зеленчук (особено зелен зеленчук), млечни производи и овошје.

Не ви е потребен изотоничен пијалак секој ден

- Спортистите или лицата што се занимаваат со активности со висок интензитет подолги од 45 до 60 минути, како и луѓето што многу се потат, ќе имаат корист од надоместувањето на електролитите - вели Зерацки.

Вежбање повеќе од еден час

Ако тренирате за трка или вежбате повеќе од еден час, важно е да ги надополнувате течностите со електролити и јаглехидрати.

- Изотонските пијалаци можат да им помогнат на многу активните лица да ги надоместат водата, јаглехидратите и електролитите што ги губат за време на интензивна или продолжена физичка активност - вели Мур.

Внесот на течности е ист за сите

Ја знаете таа стара поговорка за пиење осум чаши вода дневно? Тоа не е нужно точно. Зерацки и Мур истакнуваат дека потребите за хидратација може да варираат од ден на ден.

- Потребите за течности зависат од големината на телото, здравјето, активноста, климата (вклучувајќи ја и надморската височина) и возраста - објаснува Зерацки.

Еден изненадувачки факт што го споделува Мур е дека водата се губи и преку едноставно дишење и зборување.

- Ако зборувате многу, особено за време на физичка активност, ќе треба да пиете повеќе вода - вели таа.

Кои други фактори би можеле да влијаат врз потребата на вашето тело за течности?

Други фактори што треба да се земат предвид се медицински состојби кои можат да влијаат врз тоа колку течност ви е потребна.

- Промените поради лекови, возраст и медицински состојби како што се бременоста и доењето можат да влијаат врз вашата жед и да бараат поголем внес на течности - објаснува Зерацки.

Ако сте жедни, време е да пиете вода

Тоа е делумно точно, но Зерацки истакнува дека луѓето често ги игнорираат внатрешните знаци на жед и додека посегнат по вода, веќе многу заостануваат во дневниот внес на течности.

- Не потпирајте се на жедта како мерка за хидратација бидејќи чувството на жед често значи дека веќе сте дехидрирани - вели Мур.

Зерацки објаснува дека добра практика е да пиете околу два литри вода дневно.

- Затоа, следете како се чувствувате и приспособете го внесот на вода врз основа на тоа колку често мокрите. Треба да пиете вода рано и често. Тоа значи пиење вода во деновите пред вашата активност и за време на вашата активност - вели Мур, додавајќи дека ова е особено важно ако вежбате во топло време.

Мур, исто така, предлага да носите шише за вода што може да се полни за да останете хидрирани.

-Ако обичната вода не ви се допаѓа, размислете за додавање вкусови како свежо овошје, краставица или гранче нане - додава Мур.

Извор: n1info.hr

Фото: Freepik