Некогаш глобално популарниот музички плеер за компјутери „Винамп“ беше производ на американската компанија „Нулсофт“. Лансиран е во 1997 година како мала бесплатна програма за „Виндоус“, а набрзо стекна голема слава. Можеше да го репродуцира популарниот МП3-формат во тоа време, чија популарност рапидно растеше паралелно со него. Покрај тоа, „Винамп“ може да се надградува со различни приклучоци, да се разубавува со различни дизајни и слично, што придонесе за неговата популарност.
Од 1999 година сопственик на „Винамп“ беше АОЛ, а од 2014 година беше спасен од целосен заборав од „Радиономи“, кој ги откупи правата, но плеерот немаше успех во следните десет години. Како дел од новата компанија „Лама груп“, токму ова лето доби целосно нова мобилна апликација. Ги дели само името и можноста за репродукција на музика со оригиналниот софтвер, а сѐ друго е ново.
Сегашните сопственици ветија дека оригиналната верзија ќе биде отворена како отворен код, па тоа сега е постигнато. Ова ја оживеа надежта дека „Винамп“ може повторно да се врати на компјутерските екрани низ светот, поттикнувајќи ја носталгијата за некои древни денови на компјутерите, преземање МП3-датотеки од интернет и локална репродукција на сопствениот музички каталог.
Верзијата на „Винамп“ за „Виндоус“ сега може да се најде на „Гитхаб“, каде што се поставени програмскиот код и придружните алатки и библиотеки за програмери. Сите заинтересирани можат да го проучат овој архаичен софтвер и да предложат негови подобрувања и надградби, кои би можеле да бидат од интерес за ентузијастите и љубителите на ретротехнологиите.
Лиценцата со отворен код дозволува модификации, но не и понатамошна дистрибуција на изменетиот софтвер во некој приватен аранжман. Исто така, отворањето на програмскиот код не значи бесплатно користење на заштитниот знак и името на „Винамп“. За помалку од два дена откако беше поставен на „Гитхаб“, изворниот код на „Винамп“ веќе има 4,6 илјади ѕвезди и 1,1 илјади лансирани форк-ови („fork“ - операција при што еден процес создава копија од себе), што го потврдува големиот интерес на заедницата на програмери.
- Оваа одлука ќе воодушеви милиони корисници во светот. Не сакаме да заборавиме на десетиците милиони корисници што го користат софтверот на „Виндоус“ и кои ќе имаат корист од искуството и креативноста на илјадници развивачи на „Винамп“ - вели Александре Сабунџијан, актуелен директор на „Винамп“.
Последната официјална верзија на стариот „Винамп“ може да се преземе овде.
Извор: bug.hr
Фото: Platform X