Јапонија се подготвува да воведе дигитална номадска виза која веројатно ќе биде достапна од наредниот месец.

Оваа виза ќе им овозможи на граѓаните од 49 земји, вклучувајќи ги и земјите членки на ЕУ, да останат во Јапонија до шест месеци.

Убавите градови, разновидните пејзажи и светски познатата поп-култура ја прават Јапонија совршено место за комбинирање на работата и патувањето.

Земјата е сѐ поотворена за туристи со надеж дека ќе ја зајакне својата економија и меѓународната конкурентност, кои се загрозени од стареењето на нејзиното население.

Во земјата работат над два милиони странски државјани, што е најголем број досега, според податоците на јапонското Министерство за труд.

Граѓаните на 49 земји имаат право да аплицираат за јапонската дигитална номадска виза. Тука спаѓаат земјите што потпишале даночен договор со земјата или кои се ослободени од виза кога ја посетуваат Јапонија. Вклучени се сите земји од ЕУ, како и Ерменија, Белорусија, Грузија, Исланд, Лихтенштајн, Молдавија, Монако, Македонија, Норвешка, Србија, Швајцарија, Турција и Велика Британија.

Надвор од Европа, жителите на Австралија, Јужна Кореја, Сингапур и САД се меѓу оние што можат да аплицираат.

Визата е насочена кон висококвалификувани професионалци, особено оние што работат во ИТ-секторот. Ќе се доделува за „назначени активности“, вклучително и работа од далечина за компанија надвор од Јапонија или како самовработен хонорарец за клиенти во странство. Ова се очекува да важи и за јутјуберите кои остваруваат приходи од огласувачи во странство.

Колку треба да заработувате за да добиете јапонска дигитална номадска виза?

Апликантите за дигитална номадска виза на Јапонија мора да имаат годишен приход од најмалку 62.672 евра. Исто така, мора да имаат и приватно здравствено осигурување.

Визата им овозможува на работниците од далечина да останат во земјата до шест месеци, двојно повеќе од 90 дена дозволени во моментов за „краткорочни посетители“ без виза, на кои технички не им е дозволено да работат за време на нивниот престој. Може да се обнови за шест месеци по напуштањето на земјата, што значи дека нема да биде возможен последователен престој.

На децата и на сопружниците ќе им биде дозволено да ги придружуваат дигиталните номади за време на нивниот престој во Јапонија, под услов да бидат покриени и со приватно медицинско осигурување.

Извор: Euronews.com
Фото: Freepik