Јапонскиот премиер вели дека земјата е на работ на функционирање како општество поради падот на наталитетот.

Фумио Кишида ја опиша ситуацијата како „сега или никогаш“.

Се проценува дека Јапонија, дом на 125 милиони луѓе, имала помалку од 800.000 раѓања минатата година.

Во 70-тите години на минатиот век тој број изнесувал повеќе од 2 милиона.

Стапката на наталитет опаѓа во многу земји, вклучувајќи ги и соседите на Јапонија. Но, ова прашање е особено важно во Јапонија бидејќи очекуваниот животен век се зголеми во последните децении, што значи дека во земјата има сѐ повеќе постари луѓе, а помалку работници кои би можеле да ги издржуваат.

Според податоците на Светската банка, Јапонија сега има втор најголем процент на луѓе над 65 години во светот (28 отсто), по Монако.

- Јапонија не може да функциoнира како општество. Фокусирањето на политиките поврзани со децата и воспитувањето на децата е проблем што не може да чека и не може да се одложува - изјави Кишида пред пратениците.

Тој додаде дека сака Владата да го удвои финансирањето на програмите за деца.

- Во април ќе биде формирана нова владина агенција која ќе се занимава со ова прашање - додаде тој.

Јапонските влади се обидоа да промовираат слични стратегии и претходно, но сите тие напори беа безуспешни. Во 2020 година истражувачите предвидоа дека популацијата на Јапонија ќе се намали од 128 милиони во 2017 година на помалку од 53 милиони до крајот на овој век.

Јапонија продолжува да спроведува строги закони за имиграција и покрај некои релаксации, но некои експерти сега велат дека правилата треба дополнително да се олабават за да помогнат во справувањето со проблемите на стареењето на општеството.

Голем број фактори придонесуваат за падот на наталитетот, вклучувајќи ги и зголемените трошоци за живот, повеќе образовани и вработени жени и поголем пристап до контрацепција, што доведува до тоа жените да изберат да имаат помалку деца.

Извор: BBC
Фото: Freepik