Прелиминарна анализа на геноми на вируси посочува дека пандемијата на ковид-19 можеби има почетоци во повеќе животни. Сепак, откритијата треба да се проверат од независни експерти.

Анализата била направена на примероци од луѓе заразени со вируси во Кина и на други места во светот на почетокот од пандемијата. Според неа, коронавирусот САРС-КоВ-2, кој ја предизвикува болеста ковид-19, можеби бил пренесен од животни на луѓе повеќепати. Доколку биде потврдено, тоа може да значи дека коронавирусот сепак не бил произведен во лабораторија, според една хипотеза.


Од примероците било откриено дека две лози од коронавирусот се ширеле од крајот на 2019 и почетокот на 2020 г., а една од нив станала доминантна. Примероци од лица што го посетиле пазарот за морска храна во Вухан, на кој се продаваат и диви животни, ја имале доминантната лоза. Но другата лоза се ширела низ Кина и вклучува примероци од лица што биле на други пазари во Вухан.

Важно прашање е како се поврзани двете лози и дали едната е сој на другата или имаат посебни зачетоци. Според анализата, поверојатно е тие да имаат посебни зачетоци. Научниците анализирале примероци од 1.716 лица заболени од коронавирусот.


Доколку вирусот навистина се пренел од животни на луѓе во повеќе случаи, фактот дека двете лози се поврзани со луѓе кои посетиле различни пазари во Вухан покажува дека повеќе животни од еден или друг вид го носеле вирусот во себе и затоа успеале да го пренесат на барем две различни локации.

Според истражување во јуни, живи животни кои може да го носат коронавирусот, како ракуни и ласици, се продаваат на повеќе пазари во Вухан. Претходни истражувања покажале дека САРС веројатно бил пренесен од животни на луѓе во повеќе случаи.

Извор: Nature