Земјите низ светот ветија родова еднаквост до 2030 година, но дури и најнапредните од нив се чини дека не прават доволно за да се постигне тоа. Сепак, достигнувањата на жените во оваа година помогнаа да се приближи таа цел.

Жените сè уште се платени 20 проценти помалку од мажите и опфаќаат помалку од една четвртина од парламентарците, соопшти Меѓународната организација на трудот (МОТ).

Во изминатите децении процентот на жени на пазарот на трудот, како и во одборите на компании, се зголеми, но тие и понатаму остануваат недоволно застапени во корпоративниот свет. Но, кои се светлите точки на патот кон еднаквоста?
Ова се жените што во 2019 година беа први во своите полиња на работа.

Две астронаутки на НАСА го сочинуваа првиот женски тим во октомври кој шеташе во вселената. Имаше жени што го правеа ова порано, но ова беше првпат да немаат машко друштво. Тоа беа Џесика Меир и Кристина Кох.

Потпоручникот Шиванги е првата жена што управува со авион на индиска морнарица. Тоа се случи по три години откако индиските ВВС регрутираа први жени пилоти.

Деб Халанд и Шарис Дејвидс станаа првите американски членови на Претставнички дом во јануари од редовите на автохтоното американско население.

Судијката на Врховниот суд - Немат Абдула Аир стана првиот шеф на суданското судство, африканска држава со мнозинство муслимани.

Поранешната антикорупциска активистка и адвокатка за ЛГБТ-права, Зузана Чапутова, беше избрана за прв претседател на Словачка во јуни. ЛГБТ-активистите се надеваат дека ќе донесат позитивни промени за правата на хомосексуалците и трансродовите лица во таа конзервативна држава.

Четири жени (монахињи) станаа советнички во бискупскиот синод и се првите жени во тој совет, основан во 1965 година од Павле VI, како папско советодавно тело.

Јужноафриканката Сарај Н’куси Кумало го освои Монт Еверест.

Јалица Апарицио (26) е првата родена доморотка што е номинирана за „Оскар“. Апарицио не продолжила со глума сè до улогата на дадилката во филмот „Рома“ и ја искористила стекнатата слава за промовирање на работничките права.

Рула Халаф првпат беше прогласена за главен уредник на британскиот „Фајненшл тајмс“ од основањето на весникот во 1888 година. Халаф, родена во Либан, работи во ФТ повеќе од 20 години.

Дорсаф Ганоиати (33) е туниска фудбалска судијка која во 2019 година влезе како прва арапска и африканска жена што судеше натпревар од Првата лига.

Гита Гопиах стана првата жена главен економист на Меѓународниот монетарен фонд. Таа беше назначена на функцијата во октомври. Родена е во Колката во Индија и е професор на „Харвард“.