Александра Драговиќ, студентка на Природно-математичкиот факултет во Нови Сад, привлекува големо внимание на „Тик-ток“. На оваа најбрзо растечка социјална мрежа таа почнала да става видеа на почетокот од декември 2020 година и воопшто не очекувала речиси 54.000 следбеници.
- Студирам физика со астрономија, па често двата термина ги комбинирам во еден збор, па кога некој ќе ме праша, велам астрофизика. Имам уште неколку месеци до завршувањето на факултетот, а потоа се селам во Лондон, каде што ќе ги продолжам студиите на еден од најпрестижните колеџи во Европа. Покрај факултетот, со години се занимавам со популаризација на науката и држев предавања во училиштата и во јавноста во рамките на астрономското друштво во Нови Сад - вели таа.
Освен физиката, во слободното време сака да црта, слика, игра игри, да чита... Се одлучила за „Тик-ток“ затоа што ѝ се допаѓа форматот на кратки видеа и верува дека таквата содржина може да им го привлече вниманието на сите.
Зошто одлучивте на „Тик-ток“ да правите мини-видеа за физиката?
- Забележав дека сѐ повеќе деца се занимаваат со теории на заговор и псевдонаука од незнаење. Од теоријата дека Земјата е рамна, до теоријата дека Тесла е вонземјанин и дека патува низ времето. Со мојата содржина сакам да им помогнам на младите да стекнат способност критички да размислуваат и да ги преиспитаат информациите што се пласираат на социјалните мрежи, бидејќи денес ни се сервираат драматични и грешни вести од науката заради лајкови и прегледи.
Ве следат многу луѓе на кои им се допаѓа Вашата содржина. Дали го очекувавте тоа?
- Воопшто не. Не очекував толку голема поддршка. На „Тик-ток“ одиме за да се одмориме и да потрошиме време, не очекував дека на луѓето ќе им се допаднат физиката и астрономијата во слободно време. Повеќето имаат аверзија кон физиката затоа што на училиште ја учат на многу досаден начин.
Со какви предрасуди се соочувате и на какви предрасуди наидувате во коментарите од Вашите следбеници?
- Постојат милион предрасуди. Во коментарите ми велат дека кога ќе завршам факултет, ќе работам во продавница за минимална плата. Дека таа наука не е вредна за мојот труд. Често ми пишуваат дека „немам живот“ и дека немам пријатели, дека учам по цел ден како бубалица. Машката популација на „Тик-ток“ обожава да ми кажува дека никогаш нема да се омажам, дека ниеден маж не сака бубалици. Многу апсурдни коментари! Студирам физика, која навистина е тешка како наука, но не се разликувам многу од студентите од другите факултети, имам слободно време, разни интереси и хобија, не знам од каде потекнува предрасудата дека физичарите не го креваат погледот од книгите!
Ве споредуваат со Шелдон Купер. Колку тоа Ви годи, знаејќи дека тој е генијот во серијата што одлично ја познава физиката?
- Искрено, не сакам кога ме споредуваат со Шелдон бидејќи тоа ги влече сите овие предрасуди за кои зборував и од кои сакам да се ослободам. Мило ми е што некој мисли дека сум гениј како Шелдон, но честопати луѓето не мислат само на гениј кога ме споредуваат со него, туку и на неговото однесување и карактерни црти. Од друга страна, морам да признаам дека јас и Шелдон малку си личиме во однесувањето и дека отсекогаш сум била малку „чудна“, но не би го поврзала тоа со физиката и непријатно ми е кога некој ги истакнува тие мои „чудни“ црти затоа што врсниците често ме исмеваа поради тоа кога бев помлада.
Дали Вашите професори знаат дека имате „Тик-ток“ и какви се нивните реакции?
Повеќето професори не знаат. Некои знаат дека правам нешто, но немаат поим што. Една професорка почна да снима клипчиња за физиката на „Тик-ток“ истовремено со мене, така што единствено таа е упатена и ме поддржува.
На Вашиот профил нема само видеа поврзани со физиката, туку и предупредувања. Колку е важно тоа за вас?
- Важно ми е луѓето да не веруваат во сè и сешто. Денес навистина има сè на интернет. Најдобар пример е дека многу луѓе ги мешаат астрономијата и астрологијата. Астрономијата ја проучува физиката на универзумот и таа е наука. Астрологијата и хороскопот ги поврзуваат небесните објекти со карактеристиките на луѓето, што е псевдонаука, или во буквален превод лажна наука, тоа е верување без научни докази. Направив и клипови за тоа колку се апсурдни теориите на заговор, но тешко е да се смени нечие мислење во едноминутно видео. Неодамна дознав дека постојат веб-страници што наводно ви дозволуваат да именувате sвезди и земам големи суми за тоа. Како некој што се занимава со наука, знам дека тоа е невозможно, Меѓународната астрономска унија им дава имиња на sвездите според нивните карактеристики и телескопите со кои се пронајдени тие ѕвезди. Ниту едно лице не може да именува sвезда, па затоа ниту една компанија не може да ви земе пари за таа услуга.
Како би ја оцениле „Тик-ток“ како социјална мрежа?
Не сум сигурна што треба да мислам за „Тик-ток“. Од една страна, алгоритамот е одличен и им дава шанса на сите. Од друга страна, корисниците, кои се претежно деца, често се изложени на расизам, хомофобија, насилство од врсници, порнографија и слично. Но, тоа не е проблем само на „Тик-ток“, туку и на нашето воспитување. Кога ќе ги погледнам коментарите полни со омраза оставени на моите клипови, се згрозувам од помислата дека една млада личност може да напише такво нешто. На „Тик-ток“ ќе му дадам 8/10, а на содржината на балканскиот „Тик-ток“ ќе ѝ дадам 3/10.
Автор: Бранкица Смилјаниќ
Фото: Screenshot/Tik Tok